Senator múmkindigi shekteýli jandarǵa arnap salynatyn úi qurylysynyń sapasyn arttyrýdy talap etip otyr, dep habarlaidy "Ult aqparat".
«Memleket basshysy óziniń Qazaqstan halqyna Joldaýynda múmkindigi shekteýli adamdar árqashan memlekettiń erekshe nazarynda bolýǵa tiis degen bolatyn. Bizdiń depýtattyq saýalymyzǵa múmkindigi shekteýli adamdarǵa beriletin baspana máselesi sebep bolyp otyr. Múgedek adamdarymyz uzaq jyldar boiy turǵyn úi kezegi arqyly baspanany kezekpen alýǵa bolatynynan kúder úzip, kúmánmen qaraityn jaǵdaiǵa jetti», - dedi senator Nariman Tóreǵaliev Úkimet basshysynyń atyna joldaǵan depýtattyq saýalynda.
Onyń aitýynsha, múmkindigi shekteýli jandarǵa beriletin páterler tiisti talaptarǵa sai bolmai jatady. Paidalanýǵa berilgen turǵyn úiler men páterler bólmeleriniń ishi ýákiletti organ bekitken erejelerge sáikes, múmkindigi shekteýli adamdardyń qajettiginen týyndaityn sanitarlyq talaptarǵa sai jobalanyp berilýi kerek edi. Alaida bul talaptar oryndalmai jatyr.
Ol baiandalǵandy eskere otyryp, birqatar sharalardy júzege asyrý qajettigin aitty.
Birinshiden, Memleket basshysynyń tapsyrmasyna sáikes ázirlenip jatqan «Áleýmettik kodeks» aiasynda múmkindigi shekteýli adamdar úshin qoljetimdi orta týraly zań normalaryn ázirlep, osy kodekske arnaiy bólimmen engizý usynyldy.
Ekinshiden, múmkindigi shekteýli jandardy qoljetimdi baspanamen qamtý maqsatynda «Turǵyn úi qatynastary týraly» Zańǵa jáne múgedekterge beriletin turǵyn úilerge qoiylatyn talaptardy keńeitý bóliginde ýákiletti organnyń erejeler jinaǵyna halyqaralyq zańnamalar tájiribesin zerdelei otyryp, ózgerister men tolyqtyrýlar engizý eskerildi.
Úshinshiden, jergilikti atqarýshy organdarǵa jańadan salynatyn turǵyn úilerdiń jobalyq-smetalyq qujattamalaryn ýákiletti organnyń erejeler jinaǵynyń talaptaryna sai josparlaýdy qadaǵalaý usynyldy.
