QR Parlamenti Senatynyń depýtaty Dinar Nóketaeva Nur-Sultan, Almaty, Shymkent qalalarynda halyqtyń jyldam ósip jatqanyna alańdaýshylyq bildirdi, dep habarlaidy QazAqparat.
QR Premer-Ministriniń atyna depýtattyq saýal joldaǵan Dinar Nóketaeva zańnamadaǵy ishki kóshi-qonnyń problemalaryn kóterdi.
Aitýynsha, bul protsestiń baqylaýǵa alynbaýy áleýmettik-ekonomikalyq turaqty damýǵa jáne memlekettiń qaýipsizdigin nyǵaitýǵa kedergi keltirip otyr.
«Kóshi-qon jónindegi halyqaralyq uiymnyń aqparaty boiynsha, Qazaqstandaǵy ishki kóshi-qon jyl saiyn 1 millionnan astam adamdy qamtidy. Ishki kóshi-qonnyń negizgi baǵyty Nur-Sultan, Almaty jáne Shymkent qalalary bolyp qalyp otyr. 1992 jyly el halqynyń jalpy sanyndaǵy osy úsh qalanyń úlesi 11,1% bolsa, 2021 jyly 22,6% - ǵa deiin (eki ese) ósti. Mundai qarqyn qazirdiń ózinde iri qalalar men óńirlerdiń tym kóp qonystanýyna, aýyl halqynyń azaiýy esebinen kóshi-qon protsesteriniń teńgerimsizdigine, qoǵamdaǵy áleýmettik shielenistiń ulǵaiýyna, jumyssyzdyqtyń ósýine, turǵyn úi máselesiniń nasharlaýyna, jalpy bilim berý jáne meditsina mekemeleriniń jetispeýine jáne t. b. problemalarǵa alyp kelip otyr», - dedi depýtat.
Onyń aitýyna qaraǵanda, kóshi-qonnyń durys rettelmeýinen otbasylar buzylyp jatyr.
«Sońǵy úsh jylda ajyrasýlar sany artyp, 45%-ǵa jetti. Olardyń negizgi sebebi jumyssyzdyqpen jáne kóshi-qon protsesterimen bailanysty tabystardyń bolmaýynan týyndaýda. Álemdik tájiribeni eskere otyryp, ishki kóshi-qon saiasatyn qaita qaraýdy usynamyn. Esepke alynbaǵan ishki kóshi-qon máselelerin erekshe baqylaýǵa qoiý, sondai-aq, aýyldyq aýmaqtarǵa basa nazar aýdara otyryp, eldiń áleýmettik-ekonomikalyq damýyn jańǵyrtýmen ózara bailanysta ishki kóshi-qon aǵynyn boljaý men retteýdi jetildirý mańyzdy», - dedi Dinar Nóketaeva.
