Parlament Senatynyń jalpy otyrysynda depýtat Murat Baqtiiaruly joǵary bilim salasyndaǵy ózekti máselelerdi atady, dep habarlaidy QazAqparat tilshisi.
«Qazir elimizde 128 joǵary oqý orny bar, olardyń 82-si ýniversitet mártebesine ie bolyp otyr. Damyǵan Eýropa, Ońtústik-Shyǵys Aziia elderinde 320 myń adamǵa bir joǵary oqý orynynan keletin bolsa, bizde 141 myń adamǵa bir JOO-dan keledi», - dedi depýtat.
Onyń paiymynsha, JOO sany jóninen elimiz dúniejúzi boiynsha aldyńǵy orynǵa shyqqanymen, alaida berilip jatqan bilim sapasy kóńil kónshitpeidi.
«Birinshiden, kommertsiialyq oqý oryndarynyń kópshiligi sapaly bilim bere almai, tek qarjy jinaý quralyna ainalyp otyrǵany shyndyq. Byltyrdan bastap Ulttyq biryńǵai testileýden 50 baldan tómen alǵan kóptegen talapkerler jyl boiy úsh retten test tapsyryp, oqýyn jalǵastyra beretin boldy. Bul talapkerler negizinen 11 jyl boiy mektepte nashar bilim alǵandar, olar erteń qandai muǵalim, dáriger, injener bolmaq? Demek, JOO-lardyń kópshiligi sapaly bilimge emes, tek diplom berýge mashyqtanyp alǵan», - dep atap ótti depýtat.
Sonymen qatar senator aýmaqtyq deńgeidegi suranysqa mán berilmei kadrlar daiyndalyp jatqanyn tilge tiek etti. Eńbek resýrstaryn damytý ortalyǵynyń zertteýine súiensek, qazirgi tańda jumys berý naryǵynda nebári 30 paiyz joǵary bilimdi maman kerek bolsa, qalǵan 70 paiyz jumys oryndaryna kolledj bitirgender qajet eken.
«Kóshi-qon komitetiniń málimetine qaraǵanda, sońǵy 7 jyldyń ishinde elimizge kórshi Ózbekstan, Qyrǵyzstan, Tájikstan memleketterinen 6 mln eńbek migranty kelip, qurylys, aýyl sharýashylyǵy, turmystyq qyzmet kórsetý salalarynda jumys istep, osy bos oryndardy toltyrǵan. Biz jyl saiyn memleket jáne ata-analardyń qarajaty esebinen qazirgi naryqqa qajet emes on myńdaǵan joǵary bilimdi mamandardy daiarlap, jumyssyzdar sanyn qoldan kóbeitip otyrmyz. Jylyna bitirip jatqan osynshama joǵary bilimdi diplomy bar mamandar ekonomikamyzǵa qajet pe? Bul máseleni qalai retteimiz?», - dedi M. Baqtiiaruly.
Sonymen qatar ol otandyq JOO-larda qyzmet etetin oqytýshylar men professorlardyń eńbekaqysy tómen ekenin atap ótti.
Budan buryn habarlanǵandai, Senattyń jalpy otyrysynda depýtat Baqytjan Jumaǵulov Qazaqstannyń joǵary oqý oryndarynda granttardyń qunyn arttyrý kerektigin aitty.
