Qarjynyń ornymen paidalanbaityny týraly senatorlar az aityp júrgen joq. Bul joly da aianyp qalmady. Búgin 2018 jylǵy respýblikalyq biýdjettiń atqarylýy týraly esep berýge kelgen Úkimet pen Esep komitetiniń esepteri taǵy synǵa ilikti.
Senat depýtaty Nurlan Beknazarov óńirlerdiń áleýmettik-ekonomikalyq damýy airyqsha nazarda ekenin aita kelip: «Osy baǵyttaǵy baǵdarlamalardy iske asyrýǵa respýblikalyq biýdjetten jyl saiyn aitarlyqtai qarajat bólinedi. Sol qarjyny tiimdi paidalanýda únemi kemshilikterge jol berilýde. Sonyń saldarynan azamattardy áleýmettik qoldaý jáne el ekonomikasynyń damýyna qatysty indikatorlar boiynsha áli de qajetti joǵary mejelerge qol jetkizilmei keledi», dedi.
Sondai-aq senator taǵy bir ózekti máselelerdiń biri jergilikti biýdjetterdiń respýblikalyq biýdjetten beriletin transfertter men sýbventsiialarǵa táýeldiligi jyldan-jylǵa artyp kele jatqanyn aita kelip, salystyrmaly túrde aitqanda, 2018 jylǵy respýblikalyq biýdjetten óńirlerge berilgen sýbventsiianyń kólemi 2017 jylmen salystyrǵanda 1,2 esege óskenin jáne 1 trillion 573 milliard teńgeni quraǵanyn atap ótti.
Senator N.Beknazarov biýdjet qarajatyn nátijeli igerýge baǵyttalǵan júieli jáne keshendi josparlaý jumystarynyń qajetti deńgeide júrgizilmeitinin, ázirlengen jáne saraptamadan ótken jobalyq-smetalyq qujattamalardyń 32%-y ǵana júzege asyrylǵany, qalǵandarynyń úsh jylǵy kezeńde iske aspai, eskirip nemese qosymsha qarajat bóle otyryp, jańa saraptama júrgizýdi qajet etip otyrǵanyn synǵa aldy.
Depýtat «Tsifrlyq Qazaqstan» memlekettik baǵdarlamasy aiasynda Quqyq qorǵaý organdaryn tsifrlandyrýǵa qatysty 2 jobany júzege asyrý barysynda qarjynyń tolyq bólinbeýiniń sebebinen investitsiialyq jobalardyń tehnikalyq-ekonomikalyq negizderiniń merzimi ótip ketkenin mysalǵa keltirdi. «Baǵdarlamanyń ýaqtyly qarjylandyrylýy, túzetý jáne aldyn-ala baǵalaýdyń joqtyǵynan «Qazaqstan Respýblikasynyń shaǵyn qalalarynyń jedel basqarý ortalyqtaryn qurý jáne júzege asyrý» jobasy boiynsha satyp alynatyn jabdyqtardyń kópshiligi qazirgi talaptarǵa sai emes nemese óndiristen alyp tastalynǵan» degen senator osynyń saldarynan biýdjet qarajaty tiimdi paidalanylmai, memlekettik baǵdarlama óz merziminde oryndalmai otyrǵanyna ókinish bildirdi.
Senator óz sózinde málim etkendei, Bas prokýratýranyń «Elektrondyq qylmystyq ister» modýliniń iske qosylýyna bailanysty Ishki ister ministrliginiń «Tergeýshi» avtomattandyrylǵan aqparttyq júiesi» atqaratyn fýnktsiiasyn qaitalaý oryn alǵan, sondyqtan tehnikalyq-ekonomikalyq negizdemeni qaita túzetý qajettiligi týyndaǵan.
Azamattardyń qaýipsizdigin qamtamasyz etý ózekti másele ekenin alǵa tartqan senator Úkimetten aldaǵy ýaqytta respýblikalyq biýdjetti qaraý barysynda quqyq qorǵaý organdaryn jáne sot júiesin tsifrlandyrý baǵdarlamasyn tolyq qarjylandyrý máselin nazarǵa alýdy usyndy.
Ádilbek Qaba
