Aldaǵy jyldarǵa arnalǵan el biýdjetin Parlament tastai qylyp bekitip beredi. Qansha aqsha qaida jumsalatyny Úkimette, Májiliste, Senatta birshama ýaqyt talqylanady. Bárin eskerýge tyrysady. Biraq, sol biýdjet jyl boiynda taǵy qaita qaralyp, naqtylanyp jatady. Árine, eger jańa mindetter týyndap, reformalar jasalyp jatsa onyń jaiy bólek. Alaida biýdjetti bekitý mehanizminde birqatar eskerýge tiis máseleler de bar eken. Búgin Dariǵa Nazarbaevanyń tóraǵalyǵymen ótken 2019-2021 jyldarǵa arnalǵan biýdjetti naqtylaý týraly zań jobalaryn qaraǵan Senat otyrysyndaǵy talqylaýlar barysynda senator M. Jumaǵaziev Aýyl sharýshylyǵy salasyn mysalǵa ala otyryp, biýdjettiń qaita-qaita naqtylanýyna qatysty syn pikirin aitty.
Senatordyń aitýynsha, aýyl sharýashylyǵy salasyna qatysty Parlament bekitken respýblikalyq biýdjettiń jyl boiy birneshe ret naqtylanýynyń birinshi sebebi, jalpy sipattaǵy transfertterdiń kólemin qalyptastyrý metodikasynda eken. Transfert kólemi qazir aýyl sharýashylyǵy óniminiń úlesine emes, aýyl sharýashylyǵymen ainalysatyn halyqtyń sanyna negizdelgen. Ol óz retinde ártúrli keleńsizdikter týdyrady.
Ekinshiden, biýdjetti josparlaý barysynda «tómennen joǵary» qaǵidasyn ustanylmaidy. Durysy, aýyl sharýashylyǵynyń qurylym basshylary men jergilikti atqarýshy organdardyń usynystary negizinde biýdjetti qalyptastyrý múmkindigi qarastyrylýǵa tiis;
Úshinshiden, aýyl sharýashylyǵyn sýbsidiialaý erejeleri turaqsyz. Onyń jyl saiyn ózgerýi agrarshylardy tolǵandyryp, erteńgi kúnine senimsizdik týdyrady. Bul rette atalǵan erejeni úsh nemese bes jylǵa bekitý múmkindigin qarastyrý kerek.
Tórtinshiden, óńirlerde jalpy sipattaǵy transfert boiynsha bólingen qarajatty basqa salalarǵa jumsalý múmkindiginiń de áseri bar. Osyǵan orai, biýdjet qarajatyn tiimdi ári maqsatty paidalanýy úshin, biýdjettik baǵdarlama ákimshileriniń jaýapkershiligi arttyrylýy tiis.
Senator óz usynystaryn aita kelip Aýyl sharýashylyǵy ministri S.Omarovqa «Atalǵan máselelerdi sheshý maqsatynda qandai sharalar qabyldanady?» , - degen suraq qoidy.
Ministr S.Omarov senatordyń syny oryndy ekenin, keiingi kezde óndiris ósiminiń tez ósýi esepke alynbaǵandyqtan,qosymsha qarajat qajet bolyp, soǵan bailanysty biýdjetke ózretýler qajet bolǵanyn moiyndady. «Budan keiin aýyl sharýashylyǵy ónim óndirýshilerimen kelisilip, berilip jatqan sýbsidiialardyń jaǵdaiyn jaqsartý kerek bolǵanda ǵana ózgertemiz», - dedi ministr S. Omarov.
Senat otyrysynda senatorlar 2019-2021 jyldarǵa arnalǵan biýdjetti naqtylaý týraly zań jobalaryn qarap, tolyqtyrýlar jasap, Májiliske qaitardy.
Ádilbek Qaba
