Senat depýtaty Andrei Lýkin túrmelerde dini ekstremizmge qarsy is-qimyldy arttyrý úshin ne isteý kerek ekenin aitty, dep habarlaidy Sputnik Qazaqstan.
Senator Almatydaǵy lańkestik áreket beibit turǵyndardyń ólimine, ahýaldyń turaqsyzdyǵy men ekonomikalyq shyǵynǵa ákep soqqanyn atap ótti. Aitýynsha, qasiretti qańtar oqiǵalary kezinde tek qazaqstandyqtar ǵana emes, búkil álem ákimdik, politsiia, áýejai ǵimarattary men strategiialyq nysandarǵa terrorlyq akti jasalǵanyna kýá boldy.
"Radikalizm, ásirese qylmystyq-atqarý júiesindegi, Qazaqstannyń ulttyq qaýipsizdigine tóngen qaýip-qaterdiń biri ekenin umytpaýymyz qajet. Osy jyldyń 1 qańtaryndaǵy jaǵdai boiynsha elimizdiń qylmystyq-atqarý júiesinde dini jáne terroristik uiymdardyń 500-den astam lideri men qatysýshysy jazasyn ótep jatyr", - dedi Lýkin Premer-ministr Álihan Smaiylovqa joldaǵan depýtattyq saýalynda.
Aitýynsha, búginde 64 koloniianyń tek 9-y ǵana kameralyq qamaý túrindegi abaqty. Onda sottalǵandardyń jalpy sanynyń 18,3%-i ǵana otyr. Qoldanystaǵy qalǵan mekemeler – ótken ǵasyrdyń 30-70 jyldary salynǵan baraq tipti ǵimarattar.
"Bir baraqqa 100-ge tarta sottalýshy qamalatynyn eskersek, mundai jaǵdaida tárbie jumysy jaily aitý múmkin emes. Túrme sýbmádenieti men qylmystyq ortanyń yqpaly búkil jumysty zaia ketiredi", - dep sanaidy senator.
Osyǵan bailanysty Lýkin eń aldymen, radikaldy kózqarastaǵy sottalýshylardy kameralyq qamaýǵa aýystyrý úshin qazirgi mekemelerdi rekonstrýktsiialaý qajet ekenin aitty.
Sondai-aq túzetý mekemeleriniń qaýipsizdigi men kúzet deńgeiin arttyrýdy usyndy. Atap aitqanda, koloniialardy radiobailans, tehnikalyq kúzet quraldary, uialy bailanysty buǵattaý júiesimen jaraqtandyrý kerek.
Lýkinniń málimetinshe, búginde QAJ mekemeleri tehnikalyq kúzet quraldarymen 33%-ke, uialy bailanysty buǵattaý júiesimen 13,8%-ke ǵana jabdyqtalǵan.
Budan bólek, senator sottalǵandardyń uialy telefondardy zańsyz paidalanýyn baqylaýdy kúsheitýdi usyndy.
Buǵan qosa, QAJ mekemeleri, arnaiy mekemeler ákimshiliginiń basshylyǵyna túrme aýmaǵynda zańsyz paidalanylatyn bailanys quraldaryn buǵattaý ókilettigin berý kerek, dedi senator.
