Senat depýtaty Murat Baqtiiaruly «Rýhani jańǵyrý» baǵdarlamasy aiasyndaǵy ǵylymi jáne kórkem ádebiettiń aýdarma isin toqtatpaýdy surady, dep habarlaidy "Ult aqparat".
Senator Úkimet basshysyna joldaǵan saýalynda osyǵan deiin ulttyq baǵdarlama aiasynda jumys istep kelgen «Ulttyq aýdarma biýrosy» qoǵamdyq qory qyzmetin elimizdiń bir top belgili ǵalymdarymen birge jan-jaqty taldaý júrgizgenin atap ótti.
«Kóptegen syni pikirlerge qaramastan, taldaý jáne saraptaý barysynda az ǵana ýaqyt ishinde qyrýar jumys jasalǵanyna kóz jetkizdik. Atalmysh jobanyń arqasynda qazaqstandyq gýmanitarlyq bilim mazmuny tolyqtai jańaryp, jańa deńgeige kóterildi», - dedi senator.
Senat depýtaty «100 jańa oqýlyq» jobasyn «Bolashaq» baǵdarlamasynyń aýqymdy jalǵasyna teńedi. Atalmysh baǵdarlama aiasynda osy ýaqytqa deiin qazaq tilinde bolmaǵan, múlde jańa salalardy tanystyrdy.
«Sondyqtan da elimizdigi joǵary oqý oryndarynda oqityn stýdentterdiń 70 paiyzy memlekettik tilde bilim alatyndyǵyn eskere otyryp, joba aiasynda jinaqtalǵan qyrýar bilim men tájiribeni joǵaltyp almaý úshin elimizdegi ǵylymi jáne kórkem aýdarma jumysyn jalǵastyrý qajet dep sanaimyz», - dedi Murat Baqtiiaruly.
Depýtat qazaq tilindegi «100 jańa oqýlyq» jobasy «Jańa bilim» degen jalpy ataýmen jalǵasýy tiis dep esepteidi. Onyń aýqymyn keńeitý maqsatynda jyl saiyn aýdarylyp basylatyn kitaptar taqyrybyn úsh negizgi baǵyt: joǵary oqý oryndaryna arnalǵan oqý quraldary, álemdik kórkem ádebiet úlgileri, pýblitsistikalyq jáne iskerlik ádebiet úlgileri boiynsha toptastyrýdy usynyp otyr.
Osy ýaqytqa deiin «Rýhani jańǵyrý» baǵdarlamasynyń negizgi tarmaqtarynyń biri «Jańa gýmanitarlyq bilim. Qazaq tilindegi 100 jańa oqýlyq» jobasy aiasynda 2017 jyldan beri 77 oqýlyq aýdarylyp oqý oryndaryna taratylǵan bolatyn. Qalǵan 23 oqýlyqty aýdarý, basý jáne taratý jumystary biylǵy jyldyń aiaǵyna deiin aiaqtaý josparlanyp otyr.
