Parlament Senatynyń depýtaty Aqmaral Álnazarova Dúniejúzilik densaýlyq saqtaý uiymynyń (DDSU) Qazaqstandaǵy eldik keńsesiniń basshysy doktor Karolin Klarinvalmen kezdesti, dep habarlaidy QR Parlamenti Senatynyń baspasóz qyzmeti.
Taraptar COVID-19-ǵa qarsy kúres máselelerin, onyń ishinde Qazaqstandaǵy aǵymdaǵy jaǵdaidy, sonymen qatar Aral óńirindegi halyqtyń densaýlyǵyn qorǵaý máselelerin talqylady.
Senator Aqmaral Álnazarova Dúniejúzilik densaýlyq saqtaý uiymynyń Qazaqstanǵa Covid-19 pandemiiasymen kúreste kórsetken jan-jaqty qoldaýy men yntymaqtastyǵy úshin DDSU-nyń resmi ókiline alǵys aitty.
«DDSU bilik organdarynyń mańyzdy seriktesi bolyp keledi, óitkeni uiym COVID-19-ǵa jaýap retinde tehnikalyq usynystar ázirleidi, ózge de tehnikalyq bilikti resýrstaryn usynady. Bizdi halyq densaýlyǵyn saqtaý men zań shyǵarý máselelerindegi ózara yntymaqtastyǵymyz qýantady», - dep atap ótti Senat depýtaty.
Doktor Klarinval, óz kezeginde, DDSU Qazaqstannyń COVID-19-ǵa qarsy kúrestegi kúsh-jigerin, sondai-aq pandemiiamen kúrestiń aldyńǵy shebinde júrgen qazaqstandyq meditsina qyzmetkerleriniń kásibiligi men jankeshtiligin joǵary baǵalaitynyn jetkizdi. Sondai-aq, ol DDSU Qazaqstanǵa epidemiologiia, qaýip-qater kommýnikatsiiasy, logistika jáne ózge de densaýlyq saqtaý baǵyttarynda qoldaý kórsetýdi jalǵastyratynyn aitty.
«Yntymaqtastyq, ózara is-qimyl, bilim jáne resýrstar almasý neǵurlym tez áreket etý úshin asa mańyzdy, sondyqtan halyqtyń densaýlyǵyn qorǵaý jolynda barlyq taraptar arasynda syndarly dialog qura otyryp, bir baǵytta júrýdi jalǵastyrý mańyzdy», - dep túiindedi DDSU-nyń Qazaqstandaǵy eldik keńsesiniń basshysy.
