Senator Aqmaral Álnazarova AITV-juqpasyna diagnostika jasaýdy básekelestik ortasyna berýdi áli erte dep sanaidy. Ol Úkimet basshysy Álihan Smaiylovtyń atyna joldaǵan depýtattyq saýalynda osy máselege alańdaýshylyǵyn bildirdi, dep habarlaidy QazAqparat.
Básekelestikti qorǵaý men damytýdyń 2026 jylǵa deiingi jańa tujyrymdamasyna sáikes, AITV infektsiiasyna diagnostika jasaýdy jeke meditsinalyq ortalyqtar men zerthanalarǵa berilýi tiis. Alaida, senator atap ótkendei, bul bolashaqta eldegi AITV-men aýyrý jaǵdaiyn nasharlatatyn birqatar problemalarǵa alyp keletin bolady.
Tujyrymdama AITV diagnostikasynyń birinshi kezeńiniń ǵana básekeles ortaǵa berilýin kózdeidi. Depýtat taldaý nátijesi oń bolǵan jaǵdaida, bul berilý joldary men faktorlaryn anyqtaý, bailanys jasaýshylardy izdeý jáne zertteý jónindegi dáiekti tizbektiń buzylýyna ákeledi dep sanaidy.
«Buryn Qazaqstanda jynystyq jolmen beriletin infektsiialar men gepatitterge zertteý júrgizýdi básekelestik ortaǵa berý tájiribesi bolǵan. Nátijesinde, biz osy aýrýlardyń taralýyn baqylaýdy joǵaltyp aldyq. Búgingi tańda elde olar boiynsha naqty statistika joq jáne tiisinshe osy infektsiialarǵa jaýap berý baǵdarlamasy joq», - dedi Aqmaral Álnazarova.
Depýtat sondai-aq halyqaralyq tájiribedegi keleńsiz derekterdi de atap ótti. Basqa elderde de AITV zertteýiniń 1 kezeńi básekelestik ortaǵa berilgennen keiin, bul aýrýdyń tez taralýyna ákelip soqqan. Nátijesinde, olar birneshe jyldan keiin AITV-infektsiiasynyń diagnostikasyn memlekettik meditsinalyq mekemelerge qaitarýǵa májbúr bolǵan kórinedi.
Senator osyǵan orai Ministrler Kabinetiniń basshysyna joldaǵan saýalynda AITV-infektsiiasyna diagnostika jasaýdy tiisti júieli daiyndyqsyz jáne máseleni muqiiat zerttemei turyp básekelestik ortasyna bermeýdi ótindi.
