Senatta «Shanhai yntymaqtastyq uiymyna múshe memleketter arasyndaǵy birlesken áskeri oqý-jattyǵýlar ótkizý týraly kelisimge tolyqtyrýlar engizý týraly hattamany ratifikatsiialaý týraly» Qazaqstan Respýblikasy Zańy qabyldandy, dep habarlaidy "Ult aqparat".
«Qaralyp otyrǵan zań jobasy Shanhai yntymaqtastyq uiymyna jańadan kirgen memlekettiń birlesken áskeri oqý-jattyǵýlar ótkizý týraly Kelisimine qosylýyn, osy kelisimge ózgerister men tolyqtyrýlar engizý týraly Hattamany qabyldaý arqyly qamtamasyz etýge baǵyttalǵan. Hattamanyń maqsaty Shanhai yntymaqtastyq uiymynyń barlyq múshe memleketterine tolyq quqyqtyq jaǵdai jasaýdy qamtamasyz etý bolyp tabylady. Atap aitqanda 2017 jyldan bastap uiymynyń quqyly múshe memleketteri Úndistan men Pákistan boldy. Osy hattamany ratifikatsiialaý olarǵa uiym músheleriniń territoriialarynda ótetin birlesken áskeri oqý-jattyǵýlaryna, birlesken áskeri antiterrorlyq jattyǵýlaryna qatysýǵa múmkindik beredi», - dedi Senattyń jalpy otyrysynda baiandama jasaǵan senator Talǵat Musabaev.
Onyń aitýynsha, Hattamany ratifikatsiialaýdan kútiletin nátije - birlesken áskeri oqý-jattyǵýlardy ótkizý geografiiasyn keńeitý múmkindigi.
Kelisim aiasynda Uiymǵa múshe memleketterdiń aýmaǵynda 2 jylda 1 ret kezekpen terrorǵa qarsy baǵyttaǵy («Beibit missiia») birlesken áskeri oqý-jattyǵýlar ótkiziledi. Mundai oqý-jattyǵýlardy ótkizý qarýly kúshterdiń kásibi daǵdylary men jaýyngerlik daiarlyǵyn arttyrýǵa jáne olardyń arasynda ózara is-qimyl máselelerin pysyqtaýǵa yqpal etedi.
