Senat tóraǵasy Máýlen Áshimbaev Toqaevqa qastandyq jasamaqshy bolǵan kúdiktiniń jelide taraǵan fotosyna qatysty pikir bildirdi, dep habarlaidy Sputnik Qazaqstan.
Buǵan deiin Ulttyq qaýipsizdik komiteti sheteldik barlaý qyzmetiniń agenti ustalǵany týraly habar taratqan. Ol Prezidentke qastandyq jasaýdy josparlaǵan.
Artynan áleýmettik jelide kúdiktiniń fotosy tarady. Er adamnyń mamandyǵy jýrnalist jáne memlekettik organdardyń baspasóz qyzmetinde jumys istegeni týraly málimet bar.
"Men de Telegram-arnalarda ondai aqparattyń shyqqanyn bilemin. Biraq shynyn aitaiyn, Ulttyq qaýipsizdik qyzmeti ol aqparatty bizge rastaǵan joq. Onyń kim ekenin bilmeimiz. Resmi aqparatty eshkim bergen joq. Sondyqtan eger resmi túrde osyndai adam boldy dep aitylsa, sol kezde biz memlekettik qyzmette bolǵan, ol nege boldy, qalai boldy jáne taǵy basqa suraqqa jaýap beremiz ", - dedi Áshimbaev jýrnalisterge bergen suhbatynda.
Onyń aitýynsha, kúdiktiniń kim ekenin anyqtaý qajet. Sonda istiń mán-jaiy jáne sebepteri belgili bolady. Senat tóraǵasy tergeýdiń nátijesin kútý kerek deidi.
"Qazirgi jaǵdai aqparattyq turǵydan ońai emes. Ártúrli aqparat pen feikter bar. Sondyqtan áleýmettik jelilerdegi aqparattarǵa ustamdylyqpen qaraý kerek. Birqatar aqparat kózderin qarap, zerdelegen jón. Sizderdiń suraqtaryńyzǵa toqtalsam, qastandyq qadamdary týraly jaýap bere almaimyn. Bul máselege qatysty Ulttyq qaýipsizdik komitetiniń qyzmetkerleri tergeý amaldary aiaqtalǵannan keiin, naqty aqparatty bere alady", - dedi Áshimbaev.
