Respýblikalyq deńgeide sheshim qabyldaǵan kezde máslihat depýtattarynyń ustanymdary men pikirlerine kóbirek nazar aýdarý qajet. Bul týraly búgin Qazaqstan máslihattarynyń 25 jyldyǵyna arnalǵan respýblikalyq konferentsiiada QR Parlamenti Senatynyń Tóraǵasy Dariǵa Nazarbaeva aitty, dep habarlaidy "Ult aqparat".
«Shirek ǵasyr buryn elimizde máslihattarǵa alǵashqy sailaý ótti. QR Tuńǵysh Prezidenti – Elbasymyz Nursultan Ábishuly Nazarbaevtyń bastamasymen osy kezden bastap jergilikti ókildi organdardyń tarihy bastaldy. Búgingi konferentsiia - atqarylǵan jumystardyń qorytyndysyn shyǵarýǵa, máslihat qyzmetiniń perspektivalary men problemalary týraly aitýǵa jaqsy sebep. Bizge jumysymyz týraly, halyqtyń jaǵdaiyn jaqsartý úshin jasalatyn oń qadamdar týraly baisaldy, iskerlik áńgime qajet. Bul - ýaqyt talaby», - dedi Dariǵa Nazarbaeva.
Senat spikeri Memleket basshysy Qasym-Jomart Toqaev óziniń sailaýaldy tuǵyrnamasynda «Azamattardyń sheshimder qabyldaý protsesine qatysý jáne olardyń iske asyrylýyn baqylaý tetikterin kózdeitin jergilikti ózin-ózi basqarý organdaryn odan ári damytýdy qoldaý» qajettigin atap ótkenin eske saldy.
«Endi osy baǵytta naqty qadamdar jasaityn kez keldi. Jergilikti basqarý - bul basqarýdyń mańyzdy deńgeii. Ákimshilik reforma oǵan aitarlyqtai ókilettik berdi. Dál osy jergilikti memlekettik jáne ózin-ózi basqarý organdary halyqqa barynsha jaqyn, olar eldiń ýaiymy men úmitin jaqsy biledi. Meniń aimaqtarǵa is-saparlarym, depýtattarmen qarym-qatynas barysy respýblikalyq biýdjet, zańnamalyq jumystar boiynsha sizderde úlken potentsial bar ekenin kórsetti», - dedi ol.
Dariǵa Nursultanqyzy máslihattyqtar biýdjetti josparlaý protsedýralaryn ózgertý, oǵan depýtattardyń belsendi qatysýy, aimaqtyq tekserý komissiialaryn biýdjet jumysyna tartý máselelerin negizdi túrde kóterip kele jatqanyn aitty.
«Bul osy máselelerge qatysty bizdiń kózqarasymyz bir ekenin bildiredi jáne ary qarai qai baǵytta júretinimizdi osydan túsinýge bolady. Respýblikalyq deńgeide sheshim qabyldaǵan kezde de aimaqtardyń, eń aldymen máslihat depýtattarynyń ustanymdary men pikirlerine kóbirek nazar aýdarý qajet dep oilaimyn», - dedi Senat tóraǵasy.
