Senat halyqaralyq yntymaqtastyqty damytýǵa jáne jańǵyrtý reformalaryn iske asyrýda tájiribe almasýǵa múddeli. Bul týraly Senat Tóraǵasy Máýlen Áshimbaev Qazaqstanda jumys isteitin diplomatiialyq korpýstyń jáne halyqaralyq uiymdardyń ókilderimen kezdesýde aitty, dep habarlaidy "Ult aqparat".
Senat spikeri ekonomikadaǵy basty mindetter ártaraptandyrý, óńdeý ónerkásibin damytý, shikizatqa táýeldilikti eńserý, shaǵyn jáne orta biznesti júieli túrde qoldaý ekenin tilge tiek etti. Bul mindetterdiń bári pandemiiadan keiingi kezeńdegi basymdyqtarmen úndesedi.
«Jalpy, 2020 jyl bastalǵaly beri Qazaqstan Parlamenti 175 zań qabyldady. Onyń jartysy, naqty aitqanda, 91 zań Memleket basshysynyń elimizdi jańǵyrtý baǵdaryn iske asyrýdy zańnamalyq turǵydan qamtamasyz etý úshin qabyldandy. Barlyq zańnyń tórtten biri depýtattardyń bastamashyldyǵymen ázirlendi», – dedi Senat Tóraǵasy.
Ol sóz barysynda Prezident reformalary aiasynda qabyldanǵan negizgi zańdarǵa toqtalyp ótti. Memleket basshysy «Qazaqstandaǵy adam quqyqtary jónindegi ári qaraiǵy sharalar týraly» Jarlyqqa qol qoiǵanyna da nazar aýdardy.
«Osy Jarlyqqa sáikes biz aldaǵy ýaqytta asa mańyzdy zańdar qabyldaimyz. Atap aitqanda, múgedek adamdardyń quqyqtaryn qorǵaýǵa, áielderge qatysty kemsitýshiliktiń kez kelgen nysanyn boldyrmaýǵa, qylmystyq sot tóreligi, azaptaýlar men zombylyqtyń aldyn alý boiynsha azamattardyń quqyqtaryn qorǵaýǵa basymdyq beriledi. Sondai-aq, sot-quqyq qorǵaý júiesin jańǵyrtý jáne sybailas jemqorlyqty joiý máseleleri de nazardan tys qalmaidy», – dedi Senat Tóraǵasy.
Onyń aitýynsha, Memleket basshysynyń bastamasymen iske asyrylyp jatqan reformalar saiasi júieniń sapaly ózgerýine septigin tigizedi jáne olar uzaq merzimdi sipatqa ie.
Sóz sońynda Máýlen Áshimbaev Senat halyqaralyq yntymaqtastyqty damytýǵa jáne jańǵyrtý reformalaryn iske asyrýda tájiribe almasýǵa múddeli ekenin atap ótti.
«Biz elimizde júrgizilip jatqan ózgeristerge qatysty halyqaralyq uiymdardyń, sheteldik saiasatkerler men sarapshylardyń usynystaryn únemi nazarda ustaimyz. Zań qabyldaǵan kezde onyń bárin eskeremiz. Aldaǵy ýaqytta da yntymaqtastyqqa, ózge elderdiń Parlamentterimen ózara bailanys ornatýǵa árdaiym ashyqpyz», – dedi Máýlen Áshimbaev.
Aita keteiik, kezdesýdi Senattyń vitse-spikeri Nurlan Ábdirov júrgizip otyrdy. Is-shara barysynda senatorlar Vladimir Volkov, Dáýren Ádilbekov jáne Dinar Nóketaeva sóz sóiledi.
