QR Parlamenti Senatynyń Tóraǵasy Máýlen Áshimbaev Qyrǵyz Respýblikasynyń Tótenshe jáne Ókiletti Elshisi Jeenbek Kýlýbaevpen kezdesti, dep habarlaidy "Ult aqparat".
Senat Tóraǵasy kezdesýdi asha kelip, tatý kórshilik, tarihi ortaq tamyrlastyq, til men mádeniet ǵasyrlar boiy qazaq jáne qyrǵyz halyqtaryn baýyrlastyq pen dostyq qatynastarmen bailanystyryp kele jatqanyn atap ótti. Qazirgi ýaqytta Qyrǵyzstan Qazaqstannyń mańyzdy strategiialyq áriptesteriniń biri bolyp otyr. Máýlen Áshimbaev parlamenttik ózara is-qimyl qazaq-qyrǵyz qatynastaryn nyǵaitý faktorlarynyń biri bolyp sanalatynyn atap ótti.
M. Áshimbaev pen J. Kýlýbaev parlamentaralyq, áleýmettik-mádeni, saýda-ekonomikalyq ózara is-qimyl boiynsha ekijaqty yntymaqtastyqtyń aýqymdy máselelerin talqylady.
«Osy jyldyń kúzinde Qyrǵyzstanda sailaý ótetini jáne Jogorký Keneshtiń jańa quramy qalyptasatyny belgili. Parlamenttik bailanystardaǵy yntymaqtastyqqa odan ári qarqyn berý mańyzdy dep sanaimyn. Eki eldiń ózara qarym-qatynasyn damytýǵa parlamentter yqpal ete alatyn birqatar máseleler bar. Osyǵan bailanysty parlamentaralyq qyzmetti odan ári arttyrýdyń mańyzy zor», - dep atap ótti Máýlen Áshimbaev.
