Senat Tóraǵasy Máýlen Áshimbaev Alǵys aitý kúnine orai «Qazaq eline myń alǵys» monýmentine gúl shoǵyn qoidy, dep habarlaidy "Ult aqparat".
Palata Spikeri qazaqstandyqtardy quttyqtap, Alǵys aitý kúni dostyq, adamgershilik, ózara kómek siiaqty qundylyqtardy dáripteitinin atap ótti. Sondai-aq ol bul mereke dástúr men tarihqa kórsetilgen qurmettiń jarqyn kórinisi ekenin aitty.
"Qiyn-qystaý jyldardyń ózinde halqymyz birlik pen berekeni tý etip, qaiyrymdylyq pen qamqorlyqtyń ozyq úlgisin kórsete bildi. Alǵys aitý kúninde biz osyndai taǵylymdy tarihymyzdy dáripteimiz. Qazirgi tańda yrys pen yntymaqty saqtaý, bul qundylyqtardyń mańyzyn arttyrý airyqsha mánge ie", – dedi Máýlen Áshimbaev.
Sonymen qatar Senat Tóraǵasy álemde turaqsyzdyq beleń alǵan qazirgi kezeńde halyqtyń zamanaýi syn-qaterlerge birlesip qarsy turýy, beibitshilik pen kelisimge taban tireýi jáne ózara qurmet pen qoldaýdy nasihattaýy mańyzdy ekenine nazar aýdardy.
"Memleket basshysy Qasym-Jomart Kemeluly Toqaev birlik pen turaqtylyq bolmasa, saiasi jáne ekonomikalyq reformalardy iske asyrý múmkin emes ekenin únemi aityp keledi. Biz jahandyq syn-qaterler men elimizdegi mańyzdy ózgerister kezeńinde ómir súrip jatyrmyz. Osyndai sátte árqaisymyz birlik pen jaýapkershiliktiń qadirin tereń túsingenimiz abzal. Beibitshilik pen kelisimdi nyǵaitý jolynda judyryqtai jumylǵan jón. Bul – Otanymyzdyń odan ári ósip-órkendeýine jáne ishki saiasi turaqtylyqty qamtamasyz etýge oń yqpalyn tigizetin qadam. Osy rette Alǵys aitý kúniniń róli zor. Aldaǵy ýaqytta birligimiz bekemdelip, elimiz órlei bersin", – dedi Senat Spikeri.
Aita keteiik, is-sharaǵa Mádeniet jáne aqparat vitse-ministri Daniiar Qadyrov, Qazaqstan halqy Assambleiasy Tóraǵasynyń orynbasary Marat Ázilhanov jáne etnomádeni birlestikterdiń ókilderi de qatysty.
