Parlament Senatynyń Tóraǵasy Máýlen Áshimbaev koronavirýstan qaza tapqan jandardyń týǵan-týystaryna kóńil aitty.
Bul týraly QR Parlamenti Senatynyń baspasóz qyzmeti habarlady.
«Memleket basshysy koronavirýs indetinen qaitys bolǵan azamattardy eske alý úshin 13 shildeni Ulttyq aza tutý kúni dep jariialaǵany belgili. Soǵan bailanysty búgin barsha Qazaqstan halqy aza tutýda.
Ókinishke qarai, pandemiia saldarynan kóz jumǵan jandardyń qatarynda eldik muratty tý etken arystai azamattarymyz, ziialy qaýym ókilderi, memleket jáne qoǵam qairatkerleri, sondai-aq, ózgeniń ómiri úshin sońǵy sátke deiin kúresip ótken dárigerlerimiz bar. Biz úshin dúnieden ozǵan ár otandasymyzdyń orny bólek.
Osyǵan orai indetten qaza tapqandardyń týystary men jaqyndaryna orny tolmas qaiǵylaryna ortaqtasyp, kóńil aitamyn. Endi eshqashan mundai qaraly kún bolmasyn! Elimiz aman, jurtymyz tynysh bolsyn!
Biz qabyldanǵan sharalardyń arqasynda pandemiianyń taralýyna toitarys berip, indetti aýyzdyqtaimyz dep senemiz. Qazaq – san qily tarihynda budan da aýyr synaqtardan súrinbei ótken jáne talai tar jol, taiǵaq keshýden aman qalǵan halyq. Sonyń bárinde bekem birlik pen yrys-yntymaǵymyzǵa taban tiredik. Qazir de dál solai aýyzbirshilik tanytsaq, aýrýdyń ári qarai asqynýyna jol bermeitinimiz sózsiz.
Sondyqtan árqaisymyz jaqyndarymyzǵa janashyrlyq tanytyp, mamandar anyqtap bergen talaptardy oryndaýǵa erekshe kóńil bóleiik! Ár azamatymyzdyń amandyǵy úshin birge kúreseiik!»,-delingen habarlamada.
