QR Parlamenti Senatynyń tóraǵasy Máýlen Áshimbaev kórnekti qoǵam jáne memleket qairatkeri, Ómirbek Joldasbekov jaily esteligimen bólisti, dep habarlaidy "Ult aqparat".
«Qazaqta ultqa adal eńbek etýdiń ozyq úlgisin kórsetken tekti azamattar az emes. Solardyń biri de biregeii kórnekti qoǵam jáne memleket qairatkeri, ǵalym, akademik, tehnika ǵylymdarynyń doktory Ómirbek Joldasbekov ekeni daýsyz. Kúni keshe birtýar tulǵanyń týǵanyna 90 jyl toldy. Jalpy, Ómirbek Joldasbekov dese, eń aldymen, eske elimizdegi kóptegen azamat bilim alǵan qara shańyraq qazirgi Qazaq ulttyq ýniversiteti, burynǵy KazGÝ túsedi. Óitkeni Ómirbek Aryslanuly 16 jyl boiy osy ýniversitetti basqaryp, ony elimizdiń ǵana emes, búkil Keńes Odaǵynyń mańdaialdy joǵary oqý oryndarynyń birine ainaldyrdy. Jańa mamandyqtar, kafedralar jáne zerthanalardyń dál osy Joldasbekovtiń tusynda kóptep ashylǵany barshaǵa belgili. Al, KazGÝ qalashyǵynyń salynýyna sińirgen eńbegi óz aldyna bólek áńgime», - dep jazdy Senat tóraǵasy Facebook paraqshasynda.
Onyń atap ótýinshe, Ómirbek Aryslanulynyń nebári 39 jasynda eldegi eń basty joǵary oqý ornynyń tizginin ustaýy onyń qanshalyqty bilimdi ári bilikti bolǵanyn ańǵartady. Qairatker 1986 jyly rektorlyqtan ketkenimen, 1988 jylǵa deiin KazGÝ-de eńbek etti.
«Biz de dál sol jyly osy ýniversitetke oqýǵa túsken edik. Ol kezder bilim ordasynda Joldasbekov dáýiriniń jalyny áli basyla qoimaǵan kezeń bolatyn. Sondyqtan áigili rektordyń dúrildep turǵan shaǵynda oqymasaq ta, onyń sheber uiymdastyrýshy, naǵyz reformator ekenin stýdent kezimizden sanaǵa toqydyq. KazGÝ-diń túlegi retinde Ómirbek Aryslanulynyń jastarǵa jasaǵan jaqsylyqtaryn eshqashan umytpaimyz. Aǵamyzben ómir jolymyz 1994-1995 jyldary táýelsiz Qazaqstannyń Joǵarǵy Keńesinde túiisti. Men ol kezde atalǵan organnyń apparatynda jumys isteimin. Al Ómirbek Joldasbekov Joǵarǵy Keńestiń depýtaty, Ǵylym, bilim jáne jańa tehnologiialar komitetiniń tóraǵasy edi. Sol jyldary Ómirbek Aryslanulynyń iskerligine, tabandylyǵyna jáne parasattylyǵyna kýá boldyq. Onyń bári bizge ómirlik azyqqa ainalǵan sabaq boldy desem, qatelespeitin shyǵarmyn», - dep eske alady Máýlen Áshimbaev.
Senat spikeri keiin elimizde qos palataly Parlament qurylyp, Ómirbek Joldasbekov Májilis depýtaty bolǵanyn, sol arqyly otandyq parlamentarizmniń qalyptasýyna jáne ózi ańsaǵan táýelsizdikti nyǵaitýǵa úlken úles qosqanyn aitady.
«Bar bilimi men tájiribesin, qajyr-qairaty men qarym-qabiletin egemen eliniń erteńi úshin jumsaǵan aǵamyz ómiriniń sońyna deiin halqyna qaltqysyz qyzmet etti. Sondyqtan qashanda ulttyq múddeni bárinen biik qoiǵan, batyl bastamalary arqyly elimizdiń ǵylymy men bilimine tyń serpin bergen, Injenerlik akademiianyń jáne Mehanika-matematika institýtynyń negizin qalaǵan, ǵalymdyǵyn búkil dúnie júzi moiyndaǵan taý tulǵanyń ónegeli ómiri men ǵylymi murasyn dáripteý, ustaz rýhyna taǵzym etý – búgingi býyn men keler urpaqtyń abyroily mindeti. Aǵamyzdyń jatqan jeri jaryq, topyraǵy torqa bolsyn», - dedi ol.
