قر پارلامەنتٸ سەناتىنىڭ تٶراعاسى مەۋلەن ەشٸمباەۆ كٶرنەكتٸ قوعام جەنە مەملەكەت قايراتكەرٸ, ٶمٸربەك جولداسبەكوۆ جايلى ەستەلٸگٸمەن بٶلٸستٸ, دەپ حابارلايدى "ۇلت اقپارات".
«قازاقتا ۇلتقا ادال ەڭبەك ەتۋدٸڭ وزىق ٷلگٸسٸن كٶرسەتكەن تەكتٸ ازاماتتار از ەمەس. سولاردىڭ بٸرٸ دە بٸرەگەيٸ كٶرنەكتٸ قوعام جەنە مەملەكەت قايراتكەرٸ, عالىم, اكادەميك, تەحنيكا عىلىمدارىنىڭ دوكتورى ٶمٸربەك جولداسبەكوۆ ەكەنٸ داۋسىز. كٷنٸ كەشە بٸرتۋار تۇلعانىڭ تۋعانىنا 90 جىل تولدى. جالپى, ٶمٸربەك جولداسبەكوۆ دەسە, ەڭ الدىمەن, ەسكە ەلٸمٸزدەگٸ كٶپتەگەن ازامات بٸلٸم العان قارا شاڭىراق قازٸرگٸ قازاق ۇلتتىق ۋنيۆەرسيتەتٸ, بۇرىنعى كازگۋ تٷسەدٸ. ٶيتكەنٸ ٶمٸربەك ارىسلانۇلى 16 جىل بويى وسى ۋنيۆەرسيتەتتٸ باسقارىپ, ونى ەلٸمٸزدٸڭ عانا ەمەس, بٷكٸل كەڭەس وداعىنىڭ ماڭدايالدى جوعارى وقۋ ورىندارىنىڭ بٸرٸنە اينالدىردى. جاڭا ماماندىقتار, كافەدرالار جەنە زەرتحانالاردىڭ دەل وسى جولداسبەكوۆتٸڭ تۇسىندا كٶپتەپ اشىلعانى بارشاعا بەلگٸلٸ. ال, كازگۋ قالاشىعىنىڭ سالىنۋىنا سٸڭٸرگەن ەڭبەگٸ ٶز الدىنا بٶلەك ەڭگٸمە», - دەپ جازدى سەنات تٶراعاسى Facebook پاراقشاسىندا.
ونىڭ اتاپ ٶتۋٸنشە, ٶمٸربەك ارىسلانۇلىنىڭ نەبەرٸ 39 جاسىندا ەلدەگٸ ەڭ باستى جوعارى وقۋ ورنىنىڭ تٸزگٸنٸن ۇستاۋى ونىڭ قانشالىقتى بٸلٸمدٸ ەرٸ بٸلٸكتٸ بولعانىن اڭعارتادى. قايراتكەر 1986 جىلى رەكتورلىقتان كەتكەنٸمەن, 1988 جىلعا دەيٸن كازگۋ-دە ەڭبەك ەتتٸ.
«بٸز دە دەل سول جىلى وسى ۋنيۆەرسيتەتكە وقۋعا تٷسكەن ەدٸك. ول كەزدەر بٸلٸم ورداسىندا جولداسبەكوۆ دەۋٸرٸنٸڭ جالىنى ەلٸ باسىلا قويماعان كەزەڭ بولاتىن. سوندىقتان ەيگٸلٸ رەكتوردىڭ دٷرٸلدەپ تۇرعان شاعىندا وقىماساق تا, ونىڭ شەبەر ۇيىمداستىرۋشى, ناعىز رەفورماتور ەكەنٸن ستۋدەنت كەزٸمٸزدەن ساناعا توقىدىق. كازگۋ-دٸڭ تٷلەگٸ رەتٸندە ٶمٸربەك ارىسلانۇلىنىڭ جاستارعا جاساعان جاقسىلىقتارىن ەشقاشان ۇمىتپايمىز. اعامىزبەن ٶمٸر جولىمىز 1994-1995 جىلدارى تەۋەلسٸز قازاقستاننىڭ جوعارعى كەڭەسٸندە تٷيٸستٸ. مەن ول كەزدە اتالعان ورگاننىڭ اپپاراتىندا جۇمىس ٸستەيمٸن. ال ٶمٸربەك جولداسبەكوۆ جوعارعى كەڭەستٸڭ دەپۋتاتى, عىلىم, بٸلٸم جەنە جاڭا تەحنولوگييالار كوميتەتٸنٸڭ تٶراعاسى ەدٸ. سول جىلدارى ٶمٸربەك ارىسلانۇلىنىڭ ٸسكەرلٸگٸنە, تاباندىلىعىنا جەنە پاراساتتىلىعىنا كۋە بولدىق. ونىڭ بەرٸ بٸزگە ٶمٸرلٸك ازىققا اينالعان ساباق بولدى دەسەم, قاتەلەسپەيتٸن شىعارمىن», - دەپ ەسكە الادى مەۋلەن ەشٸمباەۆ.
سەنات سپيكەرٸ كەيٸن ەلٸمٸزدە قوس پالاتالى پارلامەنت قۇرىلىپ, ٶمٸربەك جولداسبەكوۆ مەجٸلٸس دەپۋتاتى بولعانىن, سول ارقىلى وتاندىق پارلامەنتاريزمنٸڭ قالىپتاسۋىنا جەنە ٶزٸ اڭساعان تەۋەلسٸزدٸكتٸ نىعايتۋعا ٷلكەن ٷلەس قوسقانىن ايتادى.
«بار بٸلٸمٸ مەن تەجٸريبەسٸن, قاجىر-قايراتى مەن قارىم-قابٸلەتٸن ەگەمەن ەلٸنٸڭ ەرتەڭٸ ٷشٸن جۇمساعان اعامىز ٶمٸرٸنٸڭ سوڭىنا دەيٸن حالقىنا قالتقىسىز قىزمەت ەتتٸ. سوندىقتان قاشاندا ۇلتتىق مٷددەنٸ بەرٸنەن بيٸك قويعان, باتىل باستامالارى ارقىلى ەلٸمٸزدٸڭ عىلىمى مەن بٸلٸمٸنە تىڭ سەرپٸن بەرگەن, ينجەنەرلٸك اكادەمييانىڭ جەنە مەحانيكا-ماتەماتيكا ينستيتۋتىنىڭ نەگٸزٸن قالاعان, عالىمدىعىن بٷكٸل دٷنيە جٷزٸ مويىنداعان تاۋ تۇلعانىڭ ٶنەگەلٸ ٶمٸرٸ مەن عىلىمي مۇراسىن دەرٸپتەۋ, ۇستاز رۋحىنا تاعزىم ەتۋ – بٷگٸنگٸ بۋىن مەن كەلەر ۇرپاقتىڭ ابىرويلى مٸندەتٸ. اعامىزدىڭ جاتقان جەرٸ جارىق, توپىراعى تورقا بولسىن», - دەدٸ ول.
