Búgin Parlament Senatynyń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasy ekinshi oqylymda talqylady. Qujatqa tolyqtyrýlar engizilgendikten, zań jobasy Májiliske qaitaryldy, dep habarlaidy QazAqparat.
«Zań jobasyn ekinshi oqylymda talqylaý barysynda Senat depýtattarynyń eskertpeleri men usynystaryn eskere otyryp, Májilis maquldaǵan zań jobasyna ózgerister engizý qajettigi týyndady. Máselen, Qylmystyq kodekstiń 412-1-babyna (Qylmys jasaýǵa arandatý) ózgerister engizý usynylady, oǵan sáikes qylmys jasaýǵa arandatý dep keiin áshkereleý jáne qylmystyq jaýapqa tartý nemese bopsalaý maqsatynda adamdy qylmys jasaýǵa kóndirgen jedel-izdestirý qyzmetin nemese sotqa deiingi tergep-tekserýdi júzege asyratyn laýazymdy adamnyń zańsyz áreketteri jatady. Budan basqa, QR Ákimshilik quqyq buzýshylyq týraly kodeksi 1-babynyń 2020 jylǵy 1 shildeden bastap qoldanysqa engizilgen 2-1-bóligine sáikes Kodekske ózgerister nemese tolyqtyrýlar engizý Qazaqstan Respýblikasynyń basqa da zańnamalyq aktilerine ózgerister men tolyqtyrýlar engizýdi kózdemeitin zańmen júzege asyrylady. Osyǵan bailanysty bul zań jobasynan Kodekske osy túzetýlerdi alyp tastaý qajet», - dedi senator Andrei Lýkin.
Aita keteiik, QR Úkimetiniń 2019 jylǵa arnalǵan Zań jobalaý jumystarynyń josparyna sáikes, ázirlengen zań jobasynyń maqsaty sybailas jemqorlyqqa qarsy is-qimyl salasyndaǵy zańnamany jetildirýne arnalǵan. Zań jobasymen 4 kodekske jáne 10 zańǵa ózgerister men tolyqtyrýlar engizý kózdeledi.
Zań jobasynyń negizgi mindeti – sybailas jemqorlyq kórinisteriniń júieli túrde aldyn alý jónindegi qosymsha sharalardy engizý.
Atap aitqanda:
- memlekettik qyzmetshige quny qandai da bolsyn syilyqtar syilaýǵa tyiym belgilenedi;
- ózine sybailas jemqorlyq shekteýlerin qabyldaityn adamdardyń otbasy múshelerine materialdyq syilyqaqy, syilyqtar nemese kórsetiletin qyzmetter qabyldaýǵa tyiym engiziledi.
