Senat spikeri Máýlen Áshimbaev Qazaqstandaǵy bazalyq mólsherlemeniń joǵary deńgeiine qatysty pikir bildirdi, - dep habarlaidy Tengrinews.kz agenttigi.
Áshimbaev geosaiasi shielenis jalǵasa beretinin, Qazaqstan buǵan daiyn bolyp, ekonomikalyq ósýdi qamtamasyz etý úshin ishki resýrstardy izdeýi kerek ekenin aitty.
"El ekonomikasyn nesielendirýdiń tómen deńgeiine nazar aýdarǵan jón. Búginde ekonomikany kreditteý 25 paiyz deńgeiinde saqtalyp otyr. Kóp nemese az damýshy elderde bul kórsetkish 60-70 paiyz. Singapýrda, Koreiada, birqatar Eýropa elderinde - 150 paiyz. Biz osy jyldar boiy ekonomikamyzǵa kredit berýdi qysqartyp kelemiz. Buǵan joǵary paiyzdyq mólsherleme de jumys isteidi - shamamen 14 paiyz. Biz bul úkimettiń infliatsiiany tejeýdiń basty tetigi ekenin túsinemiz. Biraq eger syrtqy táýekelder saqtalatyn bolsa, onda biz osy joǵary paiyzdyq mólsherlememen ekonomikany damyta almaimyz", - dedi Senat Tóraǵasy otyrysta.
Senat Tóraǵasy sońǵy jyldary Qazaqstan joǵary bazalyq mólsherlemeni ustap otyrǵanyna nazar aýdardy. Sonymen qatar, onyń aitýynsha, respýblikalyq biýdjetten biznes úshin paiyzdyq mólsherlemeni sýbsidiialaý máselesi qarastyrylyp jatyr.
"Bir jaǵynan, bankter ekonomikaǵa nesie bermeidi nemese joǵary paiyzdyq mólsherlememen nesie bermeidi. Ekinshi jaǵynan, biz halyq aqshasy arqyly ShOB úshin paiyzdyq mólsherlemeni sýbsidiialaimyz. Tek "Damý" Qorynyń jelisi boiynsha biyl 170 milliard teńge bólemiz. Osylaisha, biz joǵary paiyzdyq mólsherlemeni saqtaimyz, sonymen birge biýdjet shyǵyndary osy paiyzdyq mólsherlemeni tómendetýge jumsalady. Biz qandai da bir qatal sheńberde turmyz. Mundai jaǵdai memlekettik organdarǵa da, bankterge de qolaily bolyp kórinedi, óitkeni táýekel az, jaýapkershilik az. Shikizat kompaniialarynyń, munai men metallǵa qoiylǵan joǵary baǵa esebinen biz ekonomikanyń qandai da bir deńgeiin qamtamasyz etip otyrmyz. Ekonomikany kreditteý boiynsha paiymdy qalyptastyratyn jáne bul kórsetkishti batys jáne Aziia elderine jetkizetin kez keldi emes pe?"- dedi Áshimbaev.
Máýlen Áshimbaev bul máseleni Úkimettiń aldaǵy maýsym aiyndaǵy esebinde qosymsha qarastyrýdy usyndy.
