Senat depýtattary «Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy «Baiqońyr» ǵarysh ailaǵynan «Soiýz-2» zymyrandaryn ushyrý jónindegi kelisimdi ratifikatsiialaý týraly» Zań jobasyn qabyldady, dep habarlaidy QazAqparat.
Senat otyrysynda Májilis maquldaǵan «Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy poliar mańyndaǵy orbitalarǵa soltústik baǵytta ǵarysh apparattaryn ushyrý úshin «Baiqońyr» ǵarysh ailaǵynan «Soiýz-2» tipindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimdi ratifikatsiialaý týraly» Qazaqstan Respýblikasy Zańynyń jobasy qaraldy.
Zań jobasyn tanystyrǵan Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Qazaqstan aýmaǵynan «Soiýz-2» tipindegi tasymaldaǵysh zymyrandardy ushyrǵany úshin qandai tólem alynatynyn túsindirdi.
«Qazaqstan Respýblikasy Parlamentiniń Májilisi maquldaǵan «Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy poliar mańyndaǵy orbitalarǵa soltústik baǵytta ǵarysh apparattaryn ushyrý úshin «Baiqońyr» ǵarysh ailaǵynan «Soiýz-2» tipindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimge 2019 jylǵy 20 maýsymda Nur-Sultan qalasynda qol qoiyldy. Osy kelisim búkil álemdi keńjolaqty internetpen qamtamasyz etýge baǵyttalǵan OneWeb halyqaralyq jobasyn júzege asyrý úshin «Baiqońyr» ǵarysh ailaǵynan ǵarysh apparattaryn ushyrý negizinde Qostanai oblysynyń aýmaǵynda «Soiýz-2» tipindegi tasymaldaǵysh zymyrandardyń bólinetin bólikteriniń qulaý aýdanyn Resei tarapynan paidalaný tártibin retteidi. Qulaý aýdanyn paidalaný úshin Qostanai oblysynyń Jangeldi aýdany ákimshiligine túsetin jylyna 3 ret ushyrý úshin 460 myń dollar kóleminde tólemaqy anyqtalǵan. Al qosymsha ushyrý bolǵan jaǵdaida árbir ushyrý úshin 50 myń dollar kóleminde tólemaqy tólenetin bolady. Qulaý aýdany jylyna nebári birneshe ret servitýt shartyna sai qoldanylyp otyrady», - dedi ministr.
Sondai-aq, ol atalǵan zymyran bólshekteriniń qai óńirge qulaitynyn, jergilikti turǵyndardyń qaýipsizdigi qalai qamatamsyz etiletinin baiandady.
«3-6 táýlikti quraityn bul kezeńderde adamdar men úi malynyń qaýpsizdigin qamtamasyz etý úshin qulaý aýdanyna kirý jabyq bolady. Qalǵan ýaqytta qulaý aýdanynda júrýge jáne ony jaiylym retinde paidalanýǵa shekteý qoiylmaidy. Adamdardyń qulaý aýdanynan tysqary jerlerde turýy qaýipsiz bolyp tabylady. Sonymen qatar tasymaldaǵysh zymyrandardy árbir ushyrǵan saiyn jaqyn mańdaǵy tirshilik ortasyna gigienalyq baǵa berý jumystary júrgizilip, synamalary alynatyn bolady», - deidi Baǵdat Mýsin.
Vedomstvo basshysy kiik tóldeitin ýaqytta Baiqońyrdan atalǵan zymyrandardyń ushýyna shekteý qoilatynyn da eske saldy.
«Qulaý aýdanyn paidalaný kezinde janýarlar men ósimdikter álemine jyl saiyn monitoring júrgizý kózdelýde. Tabiǵat qorǵaý uiymdarynyń kiikterdiń tóldeý jáne qustardyń uia salý kezeńinde qulaý aýdanyn paidalanýdy sheteý týraly talaptary oryndalady. Iaǵni, sáýir men maýsym ailary aralyǵynda tasymaldaǵysh zymyrandar ushyrylmaidy», - dedi ministr.
