Senat spikeri Máýlen Áshimbaevtyń tóraǵalyǵymen Palata biýrosynyń otyrysy ótti. Onda depýtattar aldaǵy jalpy otyrystyń kún tártibin talqylady, dep habarlaidy "Ult aqparat".
«Senattyń kezekti otyrysyn 5 qarashada ótkizý josparlanǵan. Sonyń aiasynda senatorlar «Qazaqstan Respýblikasynyń Úkimeti men Belarýs Respýblikasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratifikatsiialaý týraly» zań jobasyn qaraidy. Sondai-aq, «Keme qatynasy týraly kelisimdi ratifikatsiialaý týraly» zań jobasy da otyrystyń kún tártibine shyǵaryldy», - delingen Senat baspasóz qyzmetiniń málimetinde.
Sonymen qatar depýtattar «Qazaqstan Respýblikasynyń keibir zańnamalyq aktilerine Qazaqstan Respýblikasynyń Memlekettik shekarasyn kúzetý jáne ulttyq qaýipsizdik máseleleri boiynsha ózgerister men tolyqtyrýlar engizý týraly» zań jobasyn qaraidy.
Biýro otyrysy kezinde Májilisten kelip túsken zań jobasy tiisti komitetke bólinip berildi. Soǵan sáikes Ekonomikalyq saiasat, innovatsiialyq damý jáne kásipkerlik komiteti «Qazaqstan Respýblikasynyń ákimshilik-aýmaqtyq qurylysy týraly» Zańǵa ózgerister men tolyqtyrýlar engizý týraly» zań jobasy boiynsha bas komitet bolyp belgilendi.
Otyrys barysynda Máýlen Áshimbaev aldaǵy ýaqytta Senat Salyq kodeksine engiziletin túzetýler boiynsha zań jobasyn qaraitynyna nazar aýdardy. Senat tóraǵasy bul óte mańyzdy qujat ekenin, depýtattardyń zań jobasyna qatysty keibir usynystary Úkimettiń qorytyndysyn qajet etetinin, sondyqtan birlesip, tyńǵylyqty jumys isteý kerektigin atap ótti.
