Senat spikeri Máýlen Áshimbaevtyń tóraǵalyǵymen Palatanyń jalpy otyrysy ótti, Jiynda respýblikalyq biýdjettiń naqtylaýy maquldandy, dep habarlaidy "Ult aqparat".
Otyrys barysynda depýtattar «2020-2022 jyldarǵa arnalǵan respýblikalyq biýdjet týraly» Qazaqstan Respýblikasynyń zańyna ózgerister men tolyqtyrýlar engizý týraly» zań jobasyn qarady.
Respýblikalyq biýdjetti naqtylaý pandemiiamen kúres jumystaryn qarjylandyrýǵa, memlekettiń áleýmettik mindetterin oryndaýǵa, «Nurly jol», «Nurly jer» memlekettik baǵdarlamalary aiasynda ekonomikanyń naqty salalaryn qoldaýǵa, agroónerkásiptik keshendi damytýǵa jáne indýstrialdy-innovatsiialyq damý baǵdarlamalaryn iske asyrýǵa baǵyttalǵan.
Senat tóraǵasy búgin qabyldanǵan zańnyń elimiz úshin mańyzy zor ekenin aitty.
«Respýblikalyq biýdjetti naqtylaý Prezidentimizdiń biylǵy Joldaýynda aitylǵan áleýmettik tapsyrmalardy oryndaýǵa, ekonomikalyq ósýdi qalpyna keltirýge jáne pandemiiamen kúresýge baǵyttalǵan. Shyn máninde, biylǵy jyl indetke bailanysty ońaiǵa tiip jatqan joq. Soǵan qaramastan Prezidentimiz memlekettiń halyq aldyndaǵy áleýmettik mindetterin oryndaý úshin bar múmkindikti jasaýda», – dedi Máýlen Áshimbaev.
Senat spikeriniń aitýynsha, respýblikalyq biýdjetti naqtylaý kezinde áleýmettik máselelerdi sheshýge, ekonomikanyń naqty sektorlaryn qoldaýǵa basa mán berilgen.
«Zań jobalaryn talqylaý barysynda Senat depýtattary kóptegen ózekti máselelerdi kóterdi. Úkimet olarǵa muqiiat nazar aýdaryp, oń sheshý úshin keshendi jumys júrgizedi dep oilaimyz. Biýdjetten bólingen qarajat sapaly ári tiimdi jumsalyp, halyqtyń igiligine, ekonomikany qalpyna keltirýge baǵyttalady dep senemiz», – dedi Senat tóraǵasy.
Sonymen qatar senatorlar «Qazaqstan Respýblikasynyń Ulttyq qorynan 2020-2022 jyldarǵa arnalǵan kepildendirilgen transfert týraly» Qazaqstan Respýblikasynyń zańyna ózgerister men tolyqtyrýlar engizý týraly» zań jobasyn maquldady.
Zań jobasynda Ulttyq qordan 2020 jylǵa arnalǵan respýblikalyq biýdjetke 4 770 mlrd. teńge somasynda kepildendirilgen transfert mólsheri belgilengen.
Sondai-aq, otyrysta birqatar depýtattyq saýaldar joldandy. Senator Baýyrjan Qaniev «Ortalyq-Batys» jobasyn iske asyrý aiasynda «Shalqar-Embi-Qandyaǵash» avtomobil jolynyń qurylysy týraly aitty. Vladimir Volkov qylmystyq-atqarý júiesindegi máselelerdi kóterdi. Al Muhtar Qul-Muhammedtiń saýaly belgili ǵalym, akademik Salyq Zimanovtyń 100 jyldyǵyna qatysty boldy.
