Prezident usynǵan damý strategiiasyn zańnamalyq turǵyda sapaly ári ýaqytyly qamtamasyz etýimiz kerek. Bul týraly búgin QR Parlamenti Senatynyń tóraǵasy Máýlen Áshimbaev aitty, dep habarlaidy "Ult aqparat".
«Ózderińizge belgili, osy aptada elimizde tótenshe jaǵdai rejimi aiaqtaldy. Soǵan bailanysty Memleket basshysy daǵdarystan keiingi damýdyń basym baǵyttaryn anyqtap berdi. Jalpy, elimizde indetpen kúres jumystary júieli júrgizildi. Prezidentimizdiń tapsyrmasy men der kezinde qajetti sheshimder qabyldanyp, naqty sharalar júzege asyryldy. Ortalyq jáne jergilikti memlekettik organdar óz mindetterin tiisti deńgeide oryndady. Sonyń arqasynda elimizde virýstyń jappai taralýyna jol berilmedi. Azamattardyń qabyldanǵan shekteýlerge túsinistikpen qaraýy da Prezident sheshimderiniń nátijeli bolýyna oń áserin tigizdi. Qazir jaǵdai aitarlyqtai turaqtandy. Degenmen, dertten áli de bolsa tolyq arylǵan joqpyz. Sondyqtan birqatar shekteýler qala beredi. Soǵan orai saqtyq sharalaryn ustanýymyz kerek», - dedi palatanyń jalpy otyrysyn ashqan Máýlen Áshimbaev.
Senat spikeri koronavirýs indeti kóptegen salaǵa aitarlyqtai zardabyn tigizgenin, soǵan bailanysty elimizde Memleket basshysynyń bastamasymen daǵdarysqa qarsy sharalar júzege asyrylyp jatqandyǵyn basa aitty. Halyqqa jáne bizneske aitarlyqtai qoldaý kórsetilip jatqanyn eske saldy.
«Prezident bul baǵyttaǵy jumystaryn ary qarai jalǵastyra beretindigin aitty. Ásirese azamattardyń densaýlyǵyn saqtaýǵa, olardyń tabysyn arttyrýǵa, biznesti qoldaýǵa, bilim jáne ǵylym júiesin jetildirýge basa mán berildi. Tótenshe jaǵdai jónindegi memlekettik komissiia ekonomikalyq ósimdi qalpyna keltirý jónindegi memlekettik komissiia bolyp qaita qurylyp, keshendi jospar daiyndalady. Senat osynyń bárin eskerip, óz jumysyn tiimdi uiymdastyrýy tiis. Biz Elbasy saiasatynyń sabaqtastyǵyn saqtai otyryp, Prezident usynǵan damý strategiiasyn zańnamalyq turǵyda sapaly ári ýaqytyly qamtamasyz etýimiz kerek. Memleket basshysy 4 mamyrda Senatta sóilegen sózinde palatanyń eń basty mindeti - sapaly zańdar qabyldaý ekenin atap ótti. Osy baǵytta birlesip nátijeli jumy isteimiz dep senemin», - dedi Senat tóraǵasy.
