QR Parlamenti Senatynyń jalpy otyrysynda «Mindetti áleýmettik saqtandyrý týraly» Zańyn qabyldandy, dep habarlaidy "Ult aqparat".
Qujatta eńbek etý qabiletinen aiyrylý, asyraýshysynan aiyrylý jáne jumysynan aiyrylý boiynsha áleýmettik tólemderdi taǵaiyndaý kezinde qoldanylatyn parametrler qaita qaraldy. Bul tólemdi ortasha eseppen 30 paiyzǵa arttyrýǵa múmkindik beredi.
Zań jobasynyń negizgi erejeleri mynalardy kózdeidi: meditsinalyq-áleýmettik saraptama júrgizý arqyly jalpy eńbekke qabilettiligin joǵaltý dárejesin kýálandyrý jáne belgileý negizinde eńbekke qabilettiligin joǵaltý koeffitsientin aiqyndaýdyń jańa tetigin engizý; mindetti áleýmettik saqtandyrý júiesinde qatysý ótiliniń qol jetkizilgen koeffitsientin jyl saiyn arttyrý; asyraýshysynan aiyrylý jaǵdaiy boiynsha áleýmettik tólemderdi eseptegen kezde asyraýyndaǵylar sanynyń qoldanystaǵy koeffitsientin arttyrý; jumystan aiyrylý sebepterine qaramastan 6 aiǵa deiingi merzimge jumysynan aiyrylý boiynsha áleýmettik tólemderdi taǵaiyndaý arqyly jumystan aiyrylý jónindegi áleýmettik tólemderdi esepteý tetigin jetildirý.
«Jalpy alǵanda, zań jobasy azamattardyń resmi jumyspen qamtylýyna yntasyn arttyryp, jumys isteitin halyqtyń mindetti áleýmettik saqtandyrý júiesimen qamtylýyna yntalandyrýǵa septigin tigizedi dep senemiz. Zań jobasyn júzege asyrý respýblikalyq biýdjetten qosymsha qarjyny talap etpeidi jáne keri áleýmettik-ekonomikalyq nemese quqyqtyq saldarǵa ákep soqtyrmaidy», - dedi QR Eńbek jáne halyqty áleýmettik qorǵaý ministri Birjan Nurymbetov.
Sonymen qatar, jalpy otyrysta «Qazaqstan Respýblikasynyń keibir zańnamalyq aktilerine mindetti áleýmettik saqtandyrý, áleýmettik qamsyzdandyrý jáne densaýlyq saqtaý salasyndaǵy memlekettik-jekeshelik áriptestik máseleleri boiynsha ózgerister men tolyqtyrýlar engizý týraly» zań jobasy qaralyp, eki oqylymda qabyldandy.
Zań jobasynda 2020 jylǵy 1 qańtardan bastap kámeletke tolmaǵan 4 jáne odan da kóp balalary bar otbasylarǵa nemese 23 jasqa deiingi kúndizgi oqý nysanyndaǵy stýdentterge memlekettik járdemaqy tóleý usynylady. Bul járdemaqy otbasynyń tabysyna qaramastan saralanǵan mólsherde taǵaiyndalady: 4 balaǵa – 42 496 teńge; 5 balaǵa – 53 127 teńge; 6 balaǵa – 63 757 teńge; 7 balaǵa – 74 388 teńge.
Kepildi áleýmettik paketti usyný aiasynda 1 jastan 6 jasqa deiingi tabysy az otbasylarynyń balalaryn azyq-túlik jiyntyǵymen jáne gigienalyq quraldarmen, 6 jastan 18 jasqa deiingi balalardy mektepterde ystyq tamaqpen, oqý quraldarymen jáne mektep formasymen qamtamasyz etý usynylady, sondai-aq olarǵa mektepke deiingi jol júrý shyǵyndary óteledi.
«2020 jyldan bastap kórsetiletin qyzmetti alýshy men ónim berýshiniń tikelei ózara is-qimyl jasaýy úshin tsifrlyq alańdy qamtatasyz etetin (múmkindigi shekteýli adamdarǵa) áleýmettik kórsetiletin qyzmetter portalyn qosýdy kózdeitin tolyqtyrýlar engiziledi. Bul rette múgedektigi bar adamdar ózderiniń jeke qajettiliktetine sáikes keletin ózderine tiesili neǵurlym sapaly tehnikalyq quraldar men ońaltý qyzmetterin derbes tańdai alady», - dedi senator Nurtóre Júsip.
Sonymen qatar jumys berýshiniń mindetti zeinetaqy jarnasyn engizý merzimin 2020 jyldan 2023 jylǵa aýystyrýǵa baǵyttalǵan túzetýler de engizilip otyr.
