Parlament Senatynyń jalpy otyrysynda «QR Úkimeti men RF Úkimeti arasyndaǵy M.V. Lomonosov atyndaǵy Máskeý memlekettik ýniversitetiniń Qazaqstandyq filialynyń jumys isteýi týraly kelisimdi ratifikatsiialaý týraly» Zańy qabyldandy, dep habarlaidy QazAqparat tilshisi.
Aita keteiik, 2000 jyly QR Tuńǵysh Prezidenti Nursultan Nazarbaev M.V. Lomonosov atyndaǵy Máskeý memlekettik ýniversitetiniń Qazaqstandaǵy filialyn ashý jóninde bastama kóterdi. Sol jyly 9 qazanda RF Prezidenti V. Pýtinniń Qazaqstanǵa sapary kezinde filialdyń qurylýy týraly hattamaǵa qol qoiyldy. Filial osy ýaqytqa deiin L.N. Gýmilev atyndaǵy Eýraziia ulttyq ýniversitetiniń bazasynda qyzmet etýde. Qazaqstandyq filaldyń qyzmetin odan ary zańnamalyq turǵyda bekitý maqsatynda 2017 jylǵy 9 qarashada Cheliabinsk qalasynda QR Úkimeti men RF Úkimeti arasynda M.V. Lomonosov atyndaǵy Máskeý memlekettik ýniversitetiniń qazaqstandyq filialynyń jumys isteýi týraly kelisimge qol qoiyldy. Osy kelisim bilim ordasynyń qyzmetin retteidi. Onda oqytý Máskeý memlekettik ýniversitetiniń oqý baǵdarlamalary negizinde júzege asyrylady.
«Sonymen birge, kelisimde Qazaqstannyń joǵary oqý oryndarynda kózdelgen kólemde Qazaqstan tarihy men qazaq tilin mindetti túrde oqytý qarastyrylǵan. Budan basqa, oqý josparlarynda Qazaqstan ekonomikasynyń erekshelikteri eskerilgen. Birinshi jáne ekinshi kýrstarda Qazaqstandy jańǵyrtýdyń ózekti máseleleri týraly áleýmettik-gýmanitarlyq pánder oqytylady» - dedi QR Bilim jáne ǵylym ministri Kúlásh Shámshidinova.
Atap aitqanda, Qazaqstan filialdyń qyzmetine múlikti óteýsiz berý jáne bilim granttaryn bólý arqyly qatysady. Filial múlikti eshkimge bere almaidy, onyń qyzmeti aiaqtalǵan jaǵdaida, múlik Qazaqstanǵa qaitarylady. Jyl saiynǵy qabyldaý jospary 125 stýdent, 40 magistrantty quraidy. Búginde filialda 605 stýdent bilim alady. Mekeme derbes zańdy tulǵa bolyp eseptelmeidi, sondyqtan Máskeý ýnversitetiniń litsenziialary men akkreditatsiiasy negizinde jumys isteidi.
«Osyǵan bailanysty kelisimde filialdyń bilim berý jáne qarjy-sharýashylyq qyzmetin baqylaý úshin vedomstvolyq komissiia kózdelgen. Filial qyzmeti 3 jylda bir ret tekseriledi, sondai-aq Qazaqstan zańnamasynda belgilengen ózge de tekserýler ótkizýge bolady», - dedi ministr.
Budan basqa, kelisimniń 12-shi baby jáne hattama arqyly osy kelisimge ózgerister engizý múmkindigi bar jáne bul ózgerister qujattyń ajyramas bóligi bolady.
Kúlásh Shámshidinovanyń aitýynsha, oqýdy sátti aiaqtaǵan stýdentterge Máskeý memlekettik ýniversitetiniń diplomy beriledi. 390 professor men oqytýshynyń 130-y bas ýniversitetten tartylady. 14 jyl ishinde 1 725 maman daiarlanyp shyqty. Monitoring nátijelerine qaraǵanda, sońǵy 5 jylda túlekterdiń 93 paiyzy Qazaqstanda jumysqa ornalasty. Qazaqstan zańnamasyna sáikes, filial túlekteriniń mindetti túrde jumys óteý qajettigi kelisimde bekitilgen
