Senat Tóraǵasy Máýlen Áshimbaev bul zań jobasy qoǵamda belsendi túrde talqylanǵanyn atap ótti. Balalardy qorǵaý týraly normalardy iske asyrý jóninde azamattyq belsendiler túrli usynystar aityp, zań jobasynda usynylǵan erejelerdi muqiiat zerdeledi jáne kelip túsken ótinishterdi eskere otyryp, onyń birqatar baptaryn qaita qaraýdy usyndy.
"Senatorlar zań jobasynan ýákiletti organǵa óz qalaýy boiynsha internet-resýrstardyń, áleýmettik jeliler men messendjerlerdiń qoljetimdiligin shekteýge ne jumysyn toqtata turýǵa múmkindik beretin ókilettikterdi alyp tastady. Soǵan sáikes onlain-platformalardyń ókilderimen ózara is-qimyl kezinde balaǵa qatysty kiberbýlling dep tanylǵan aqparatty ǵana joiýǵa mán berildi. Mundai tártip balalarǵa qatysty kiberbýlling faktilerine jedel nazar aýdarý men qoǵamnyń aqparatqa degen suranysy arasyndaǵy teńgerimdi ortany tabýǵa múmkindik beredi dep senemiz. Bizdińshe, mundai qadam «Jańa Qazaqstan» tujyrymdamasyna jáne Memleket basshysynyń bastamasymen elimizde júrgizilip jatqan saiasi reformalardyń mazmunyna sai keledi", - dedi Máýlen Áshimbaev.
Senatorlardyń usynysy boiynsha Aqparat jáne qoǵamdyq damý ministrligi óz qalaýy boiynsha internet-resýrstardyń, áleýmettik jeliler men messendjerlerdiń jumysyn shekteýge nemese toqtatýǵa múmkindigi bolmaidy. Tek balaǵa qatysty kiberbýling dep tanylǵan aqparatty ǵana joiýǵa bolady.
Balalarǵa qatysty kiberbýlling qandai bolmaq, ózgesi qandai bolady, senatorlar ony memlekettik organǵa emes, arnaiy qurylǵan sarapshylar tobyna sheshýdi usyndy.
Osylaisha, zań jobasynyń osy jáne basqa da birqatar ózgeristeri Májilis depýtattarynyń qaraýyna jiberildi.
Osyǵan deiin sheteldik áleýmettik jelilerdiń resmi ókildikterin Qazaqstanda mindetti túrde ashý týraly norma da joiylǵan bolatyn.
