Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa tolyqtyrýlar engizilgendikten, zań jobasy Májiliske qaitaryldy, dep habarlaidy QazAqparat.
Zań jobasy el ekonomikasynyń sapaly jáne turaqty damýyn zańnamalyq turǵydan qamtamasyz etý maqsatynda ázirlendi.
Atalǵan zań jobasymen Qazaqstan Respýblikasynyń 85 zańnamalyq aktisine ózgerister men tolyqtyrýlar engiziledi.
Qujatta salymshylardyń turǵyn úi jaǵdailaryn jaqsartý jáne emdelýge aqy tóleý úshin biryńǵai zeinetaqy jinaqtaý qoryndaǵy mindetti zeinetaqy jarnalary jáne mindetti kásiptik zeinetaqy jarnalary esebinen birjolǵy zeinetaqy tólemderine quqyǵy kózdeledi.
Senattyń Ekonomikalyq saiasat, innovatsiialyq damý jáne kásipkerlik komitetiniń qorytyndysyna qaraǵanda, zań jobasynda beirezident-bank filialyn ashýǵa ruqsat berýdi, litsenziialaý, depozitterge kepildik berý jáne saqtandyrý tólemderi, sondai-aq qyzmetin toqtatý máselelerin qosa alǵanda, Qazaqstan Respýblikasyndaǵy beirezident-bankterdiń filialdaryn, beirezident saqtandyrýuiymdarynyń filialdaryn qurý jáne olardyń qyzmetin júzege asyrý tártibi reglamentteledi.
Zań jobasynda jer zańnamasyna erekshe qorǵalatyn tabiǵi aýmaqtardyń jerin bosalqy jerge aýystyrý tártibine qatysty ózgerister engiziledi, mundai aýystyrý úshin erekshe jaǵdailardyń tizbesi keńeitiledi.
Budan basqa, avtomobil kóligi salasyndaǵy tasymaldaý qyzmetine bailanysty qujattardy tirkeýdi, esepke alýdy, óńdeýdi jáne saqtaýdy qamtamasyz etýge baǵyttalǵan tasymaldaý salasyndaǵy biryńǵai aqparattyq júieni engizý, sondai-aq ziiatkerlik kólik júiesin qurý jáne onyń jumys isteý tártibi kózdeledi.
Qujat aiasynda memleketke tiesili baǵaly qaǵazdardy shet memleketterdiń qor birjalarynda ótkizý múmkindigi beriledi.
Zań jobasynda «elektrondyq úkimet» veb-portaly arqyly elektrondyq nysanda memlekettik qyzmetter kórsetý jáne «elektrondyq úkimet» shliýzinde ornalasqan servistermen integratsiialanǵan aqparattandyrý obektileriniń qyzmeti reglamentteledi.
Zań jobasymen jumys barysynda QR Parlamenti Senaty komitetteriniń birqatar ózgerister men tolyqtyrýlar engizý qajettigi týyndady.
Senator Edil Mamytbekov qujatty qaraý kezindegi talqylaý barysynda naqtylaýshy sipattaǵy ózgerister men tolyqtyrýlar engizý qajettigi bolǵanyn atap ótti. Osy oraida ishki qarama-qaishylyqty boldyrmaý jáne zań jobasynyń normalaryn qoldanysqa engizý eskerilgen.
Óz kezeginde Senat Tóraǵasy Máýlen Áshimbaev atalǵan zaǵ jobasyna qatysty pikir bildirdi.
«Memleket basshysynyń tapsyrmasymen azamattardyń óz zeinetaqy jinaǵynyń bir bóligin baspana alýǵa jáne emdelýge jumsaýy úshin qoldaný quqyǵy belgilenedi. Sondai-aq, kásipkerlerge ózi birlesip jumys isteitin taraptyń jaǵdaiyn anyqtaýǵa jáne is-áreketiniń táýekelin azaitýǵa múmkindik beretin biznes-seriktesterdiń tizilimin daiyndaý qarastyrylǵan», - dedi M. Áshimbaev.
Senat Tóraǵasy «Biryńǵai tereze» qaǵidasy boiynsha «Bizneske arnalǵan Úkimet» qyzmetin iske qosý kózdelip otyrǵanyn atap ótti. Zań jobasy mikroqarjy uiymdary men basshylarǵa qoiylatyn talaptardy arttyrýdy da kózdeidi. Bul qaryz alýshylardyń múddelerin qorǵaýǵa jáne qarjy naryǵynda turaqtylyqty qamtamasyz etýge múmkindik beredi.
Senatorlar zań jobasyn pysyqtap, Májiliske qaitardy.
