Senat depýtaty Nurlan Qylyshbaev aýdan jáne aýyldarda memlekettik qyzmette jumys isteitin turǵyndardyń 7-20-25" baǵdarlamasyna qatysa almai otyrǵanyn aitty, dep habarlaidy Sputnik Qazaqstan tilshisi.
QR Indýstriia jáne infraqurylymdyq damý ministrligi qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary Baqytjan Qashaqov "7-20-25" baǵdarlamasyna qatysý úshin ailyq tabys shamamen 150 myń teńgeden asýy qajet ekenin atap ótti.
"Olar elimizdiń kez kelgen óńirinen quny 25 million teńgege deiingi jańa salynǵan páterdi satyp ala alady", - dedi ol.
Alaida depýtat Nurlan Qylyshbaev munymen kelispeitinin jetkizdi.
"Komitet bergen aqparatpen kelise almaimyn. Óńirlerde 150 myń teńge jalaqymen páter alatynyna kúmánim bar", - dedi ol.
Onyń aitýynsha, eki balasy bar otbasynyń tek 12 million teńgeniń páterin alýǵa shamasy jetedi.
"Bankter otbasynyń taza tabysyn esepteidi. Turǵyndardyń ekinshi deńgeili bankterde qaryzy bolmaýy kerek. Baǵdarlamada ipotekalyq zaem dep jazylǵanymen, bankter basqa qaryzdardyń bolmaýyn jáne kredit tarihynyń jaqsy bolǵanyn talap etedi. Bul – bankter qoiatyn negizgi talap", - dedi Nurlan Qylyshbaev.
Depýtat aýdandyq balabaqshadaǵy jas tárbieshi 50 myń teńge, al kategoriiasy bar tárbieshi 70 myń teńge, balabaqsha meńgerýshisi myń teńge jalaqy alatynyn aitty. Sondai-aq, onyń aitýynsha, aýdandyq deńgeidegi jetekshi ákimdik qyzmetkeriniń jalaqysy 55 myń teńge, bas maman 55 myń teńge, eńbek ótili joq bólim basshysy 125 myń teńge, eńbek ótili joǵary bólim basshysy 190 myń teńge kóliminde tabys tabady.
"Qarapaiym mekteptegi kategoriiasy joq muǵalimniń jalaqysy 50 myń teńge, joǵary kategoriialy bir stavkada jumys isteitin ustazdyń jalaqysy 90 myń teńge, joǵary kategoriialy 1,5 stavkadaǵy pedagog 150 myń teńge alady. Al kategoriiasy joq dáriger 56 teńge, joǵary kategoriialy dáriger 77 myń teńge, kezekshilikti eseptegende kategoriiasy joq dáriger 77 myń teńge, joǵary kategoriialy dáriger 119 myń teńge alady", - dep tizip shyqty Nurlan Qylyshbaev.
Senator qorytyndylai kele, aýdan jáne aýyldardaǵy qyzmetkerlerdiń "7-20-25" baǵdarlamasyna qatysa almai otyrǵanyn atap ótti.
"Sondyqtan aýyldyq jerlerdegi turǵyndardy baspanamen qamtamasyz etýdiń jańa jolyn izdeý kerek. Biz atalǵan baǵdarlamaǵa qandai áleýmettik toptar qatysyp jatqanyn bilgimiz keledi. Óńirlerdegi turǵyndardyń tólem qabileti bankterdiń talabyna sáikes kelmei otyr. Kóptegen turǵynnyń kredit tarihy nashar", - dep túiindedi sózin depýtat.
