Sýret ashyq derekkózden alyndy
Senat depýtattyǵyna sailanatyn kandidattardyń shyǵystar mólsheri 550 myń teńge shamasynda belgilendi. Bul týraly Ortalyq sailaý komissiiasynyń múshesi Sábila Mustafina aitty, dep habarlaidy QazAqparat.
«QR-daǵy Sailaý týraly» Konstitýtsiialyq zańnyń 28-baby 3-tarmaǵyna sáikes, memleket Senat depýtattyǵyna sailanatyn kandidattarǵa óz baǵdarlamalarymen BAQ-qa shyǵý úshin qarajattyń bólinýine kepildik beredi. Kandidattarǵa BAQ-qa shyǵý úshin qarajat bólý kólemin Ortalyq sailaý komissiiasy aiqyndaidy. OSK-niń 2018 jylǵy 28 tamyzdaǵy Kandidattarǵa BAQ-qa shyǵý úshin qarajat bolý qaǵidalary men kólemderi týraly №12-202 qaýlysyna sáikes, teledidardan 15 minýt, radiodan 10 minýt, merzimdi basylymdarda nemese jelilik basylymdarda 0,1 baspa tabaqtan aspaityn kólemde 2 maqala jariialaý úshin birdei qarajat bólý kózdelgen. Sondai-aq «QR-daǵy sailaý týraly» Konstitýtsiialyq zańnyń 33-baby 2-tarmaǵyna sáikes, respýblikalyq biýdjet qarajatynan OSK belgilengen mólsherde kandidattardyń sailaý aldyndaǵy kópshilik sharalaryn ótkizýge, úgit materialdaryn shyǵarýǵa, kólikke jumsaityn shyǵystary jabylady», - dedi ol komissiia otyrysynda.
Onyń atap ótýinshe, osyǵan orai kandidattardyń respýblikalyq biýdjet qarajatynan jabylatyn shyǵystarynyń mólsherin belgileý týraly OSK qaýlysynyń jobasy daiyndalǵan.
«Senat depýtattyǵyna sailanatyn kandidattardyń shyǵystar mólsheri 550 myń teńge shamasynda belgilenip otyr. Baǵdarlamany teledidar, radio arqyly baiandaý jáne merzimdi baspasóz basylymdarynda 2 material jariialaý 400 myń teńge somasynda, sailaý aldyndaǵy jariia is-sharalardy jáne úgit materialdaryn shyǵarýǵa 70 myń teńge somasynda, kóliktik shyǵystarǵa 80 myń teńge somasynda bolady», - dedi Sábila Mustafina.
