Búgin senattyń jalpy otyrysynda Prezidenttiń usynýy boiynsha Joǵarǵy sot sýdiasyn sailaý týraly másele qaraldy, dep habarlaidy Sputnik Qazaqstan tilshisi.
"Sizderdiń qaraýlaryńyzǵa Memleket basshysynyń Joǵarǵy sot sýdiasy qyzmetine Meirambek Taimerdenovti sailaý týraly usynymy engizilip ottyr. Meirambek Taimerdenov belgili jáne tájiribeli zańger, prokýratýra, ádilet organdarynda jáne tikelei sot júiesinde birtalai jyl eńbek etti. Sýdialyq qyzmet ótili 15 jyldan asady. Onyń ishinde basshy sýdia laýazymdarynda on bir jyldan beri qyzmet atqarýda. Kezinde Almaty qalalyq sotyn basqardy, sońǵy jyldary Almaty oblystyq sotynyń tóraǵasy boldy", - dedi Joǵarǵy sot keńesiniń tóraǵasy Talǵat Donaqov.
Senat otyrysyna qatysyp otyrǵan 46 depýtattyń 45-i usynylǵan kandidatýrany qoldap daýys berdi. Bir depýtat daýys bermegen.
Osydan keiin joǵarǵy sot sýdiasy qyzmetine sailanǵan Meirambek Taimerdenov depýtattar aldynda ant berdi.
Meirambek Taimerdenov 1958 jyly týǵan, joǵary zańgerlik bilimi bar.
Óziniń eńbek jolyn zańgerlik mamandyǵy boiynsha 1983 jyly Almaty oblysy Qaskeleń aýdandyq halyq sotynyń sot oryndaýshysy laýazymynan bastaǵan.
1993 jyldan 1997 jylǵa deiin prokýratýra organdarynda qyzmet istedi.
1997 jyly sáýir aiynda Almaty oblysy Jambyl aýdandyq sotynyń sýdiasy bolyp taǵaiyndaldy.
1999 jyly – Almaty oblystyq sotynyń sýdiasy.
2001-2005 jyldary – Ádilet ministrligi tirkeý qyzmeti komitetiniń tóraǵasy.
2006 jyly Joǵarǵy sottyń janyndaǵy sot ákimshiligi jónindegi komitet tóraǵasynyń orynbasary bolyp taǵaiyndaldy.
2007-2012 jyldary – Almaty oblystyq sotynyń tóraǵasy.
2012 jyldyń naýryzynan bastap – Almaty qalalyq sotynyń tóraǵasy.
2013 jylǵy jeltoqsannan qazirgi ýaqytqa deiin Almaty oblystyq sotynyń tóraǵasy qyzmetin atqardy.
