QR Parlamentiniń Senaty «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Qazaqstan Respýblikasy Zańy jobasyna birqatar túzetý engizdi, dep habarlaidy QazAqparat.
«Zań jobasyn talqylaý barysynda beibit jinalystardy uiymdastyrý jáne ótkizý úshin arnaiy oryndardy belgileý jáne onyń sanyna qatysty suraqtar boldy, ol qoǵamda da keńinen talqyǵa tústi. Komitet astananyń, respýblikalyq mańyzy bar jáne oblys ortalyqtary bolyp esepteletin qalalar men olardyń quramyna kiretin aýdandarda arnaiy oryndar mindetti túrde ortalyqta ornalasýy jáne olardyń sany úsheýden kem bolmaýy tiis degen pikirde. Bul jinalystar men mitingige, tosqaýyl qoiýǵa qatysýshylardyń «kóriný jáne estilý» jáne olardy ótkizý múmkindigin arttyrady», - dedi Senattyń jalpy otyrysynda zań jobasy boiynsha baiandama jasaǵan senator Sársenbai Eńsegenov.
Onyń aitýynsha, atalǵan usynys Zań jobasynyń osy máseleni retteitin 9-babynyń 2-shi tarmaǵyna qosymsha ekinshi bólik retinde engizilgen. Sonymen birge, Zań jobasynyń beibit jinalystar ótkizýden bas tartý negizderin aiqyndaityn 14-baptyń 1 tarmaǵynyń 10-tarmaqshasyn alyp tastaý usynylady.
«Bizdiń oiymyzsha beibit jinalystar ótkizý kezinde tirshilikti qamtamasyz etýge bailanysty máseleler arnaiy oryndardy belgilegen kezde qaralyp eskerilýi kerek. Beibit jinalystardy toqtatý negizderi men tártibi 18-bapta kózdelgen. Osy baptyń 1-tarmaǵynyń 3-tarmaqshasyna sáikes beibit jinalystarǵa qatysýshylardyń kúsh qoldaný áreketterin jasaýy, sondai-aq beibit jinalystardy uiymdastyrýshynyń beibit jinalysty uiymdastyrý jáne ótkizý tártibine qatysty osy Zańynyń talaptaryn buzýy beibit jinalysty toqtatýǵa negiz bolady», - dedi senator.
S.Eńsegenovtiń paiymynsha, bul qoǵamdyq tártip, densaýlyq saqtaý, basqa adamdardyń quqyqtary men bostandyqtaryn qorǵaýǵa baǵyttalǵan mańyzdy norma. Onyń zańda oryn alýy jón.
«Degenmen, qatysýshy nemese qatysýshylar tarapynan zańnyń buzylýy joiylǵan jaǵdaida beibit jinalystardy jalǵastyrýǵa múmkindik berý durys degen oidamyz. Sondyqtan joǵaryda atalǵan normany alyp tastaý jáne 18-bapty jańa 4 tarmaqpen tolyqtyrý usynylady», - dedi ol.
Osydan keiin depýtattar atalǵan zań jobasyna Senat enizgen túzetýlerdi Májiliske jiberý týraly qaýlyǵa biraýyzdan daýys berdi.
