Parlament Senatynyń jalpy otyrysynda «Eýraziialyq ekonomikalyq odaq sheńberinde aýyl sharýashylyǵy janýarlarymen selektsiialyq-asyl tuqymdyq jumys júrgizýdi birizdendirýge baǵyttalǵan sharalar týraly kelisimdi ratifikatsiialaý týraly» Zańy qabyldandy, dep habarlaidy "Ult aqparat".
Kelisim múshe memleketterde aýyl sharýashylyǵy janýarlarymen selektsiialyq-asyl tuqymdy jumys júrgizý tártibin retteidi jáne Eýraziialyq ekonomikalyq odaq aiasynda asyl tuqymdy mal sharýashylyǵy naryǵyn damytýǵa jáne ózara saýdadaǵy kedergilerdi joiýǵa baǵyttalǵan.
«Kelisimdi ázirleý jumysy 2014 jyldan bastap Eýraziialyq ekonomikalyq komissiianyń jumysy aiasynda júrgizilgenin, jumys tobynyń eskertýlerin eskere otyryp, pysyqtalǵanyn atap ótken jón. Kelisim asyl tuqymdy mal sharýashylyǵy jáne agroónerkásiptik keshen salasyndaǵy ulttyq zańnamanyń maqsattary men mindetterine sáikes keledi. Kelisimniń uǵymdyq apparatynda «asyl tuqymdyq ónim», «asyl tuqymdyq qundylyq», «asyl tuqymdyq janýar», «selektsiialyq jáne asyl tuqymdyq jumys» jáne «aýyl sharýashylyǵy janýary» siiaqty terminder birizdendirilgen jáne naqtylanǵan», - dedi Aýyl sharýashylyǵy ministri Saparhan Omarov.
Selektsiialyq-asyl tuqymdyq jumys júrgizý kezinde múshe memleketterde asyl tuqymdyq ónim óndirý salasyndaǵy biryńǵai talaptardy qoldaný maqsatynda Kelisimde mynalardy birizdendirý kózdeledi:
1. Asyl tuqymdy janýarlardyń tuqymyn (tuqymdyǵyn) anyqtaý tártibi (bul rette jańa tuqym shyǵarýda týystas tuqymdar tizbesi kelisiledi);
2. EAEO-ǵa múshe memleketterde aýyl sharýashylyǵy janýarlarynyń shyǵarylǵan jańa tipterin, jelileri (tuqymdary) men krostaryn baiqaýdan ótkizý tártibi (jańa tuqym shyǵarýdaǵy jumystardy birkelki etý qamtamasyz etiledi);
3. EAEO-ǵa múshe memleketterdiń asyl tuqymdy ónimine molekýlalyq genetikalyq saraptama júrgizý erejesi (DNK zertteýlerin júrgizý birizdendiriledi);
4. EAEO-ǵa múshe memleketterde júrgiziletin asyl tuqymdy mal sharýashylyǵy salasyndaǵy selektsiialyq-asyl tuqymdyq jumysty úilestirý jáne taldamalyq qamtamasyz etý tártibi ;
5. EAEO-ǵa múshe memleketter arasynda jáne úshinshi elderden ákelý kezinde almastyrýǵa jatatyn asyl tuqymdy janýarlar men selektsiialyq jetistikter týraly málimetter quramy.
6. Janýarlardyń asyl tuqymdyq qundylyǵyn baǵalaý ádistemeleri.
«Asyl tuqymdy mal sharýashylyǵynda, múshe memleketterde innovatsiialyq tehnologiialardy, onyń ishinde genomdyq selektsiiany ázirleý jáne engizý maqsatynda Kelisimde asyl tuqymdy mal sharýashylyǵy salasyndaǵy selektsiialyq-asyl tuqymdyq jumysty úilestirý jáne taldamalyq qamtamasyz etý jónindegi biryńǵai tártipti belgileý kózdeledi. Selektsiialyq-asyl tuqymdyq jumysty úilestirýdi múshe memleketterdiń ýákiletti organdary júzege asyrady, taldamalyq qamtamasyz etý ǵylymi-zertteý uiymdaryna beriledi. Sondai-aq, Kelisimde Eýraziialyq ekonomikalyq odaqqa múshe memleketterdiń asyl tuqymdy mal jáne selektsiialyq jetistikter týraly málimettermen almasýy kózdeledi», - S. Omarov.
Kelisimdi ratifikatsiialaý: EAEO aiasynda selektsiialyq-asyl tuqymdyq jumys júrgizýdi ońtailandyrýǵa, mal sharýashylyǵyndaǵy selektsiia men asyl tuqymdyq jumystyń damýyn qamtamasyz etýge, otandyq asyl tuqymdy ónimniń básekege qabilettiligin arttyrýǵa múmkindik beredi.
