Semei qalasy turǵyndarynyń jylýǵa qaryzy 375 mln teńgege jetip otyr, dep habarlaidy "Ult aqparat".
Búgingi tańda shahar turǵyndarynyń jylýǵa qaryzy 375 million teńgeni quraidy. Onyń ishinde 250 mln-nan astamy jeke tulǵalarǵa, al 124 milliony zańdy tulǵalarǵa tiesili. Endi qaryzyn ótemegen boryshkerler jylýmen qamtamasyz etilmeitin bolady.
«Júz myń teńgeden astam qaryzy bar abonentterdi óshiremiz. Bereshegi júz myńnan az turǵyndarmen sot oryndaýshylary ainalysady. Jylytý maýsymynyń sońynda tólem jóninde habarlama jiberilgen soń, oǵan bir-eki ai kóleminde ýaqyt beriledi. Alaida azamattar bul eskertýdi múlde elemeidi. Sondyqtan tólemegender jylýdan ajyratylady. Bul kelisim-shartta kórsetilgen», – deidi Semei qalalyq jylý inspektsiiasy basshysynyń orynbasary Erik Raiymjanov.
Onyń aitýynsha, jylýdy qaita qostyrý úshin abonent 70 myń teńgege shyǵyndalady. Zańdy tulǵalar úshin qaita qosylý baǵasy budan da qymbat.
