Semeilik zeinetker Rostislav Polkovskii Shyǵys Qazaqstan oblysyndaǵy saǵattyq beldeýdi ózgertýdi usyndy, dep habarlaidy QazAqparat.
Osyndai usynysty ol aimaq basshysy Danial Ahmetovke joldaǵan.
«Óńir turǵyndary óz ýaqyt beldeýinde turyp jatqan joq. Jazdyń kúni saǵat 21:00-de qarańǵy túse bastaidy. Balalardy úige kirgizip, jaryq qosamyz. Al saǵat 04.00-de kún shyǵyp, onyń adamǵa paidasy mol sáýlesi túskende biz uiqyda jatamyz. Al tańerteń saǵat 9.00-da, bazarda isteitin halyq 10.00-da jumysqa jol tartqanda kún qatty ysyp ketedi», - dep jazady Rostislav Polkovskii.
Zeinetker saǵat tilin bir saǵatqa alǵa jyljytýdy usynyp otyr. Onyń aitýynsha, ýaqyt beldeýin ózgertý oblys jurtshylyǵynyń densaýlyǵyn jaqsartyp, elektr qýatyn únemdeidi.
«Buǵan Shyǵys Qazaqstannyń millionnan astam turǵyny riza bolady. Al Óskemen, Altai jáne basqa da qalalar men eldi mekender osydan da qiyn jaǵdaida ómir súrip jatyr. Óitkeni onda kún Semeiden de erte batady», - deidi R. Polkovskii.
Semei turǵyny qalalyq máslihat depýtaty Gúljanat Rahatqyzyna osyndai usynyspen júgingen bolatyn. Qazirgi ýaqytta hat oblys ákimi Danial Ahmetovke joldandy.
Aita keteiik, búginde Semeide kún 7:45-te, Óskemende 7:35-te, elordada 8:22-de shyǵady. Iaǵni, bir saǵatqa jýyq aiyrmashylyq bar.
