Shyǵys Qazaqstan oblysynda Semei qalasyna jaqyn jerdegi Sýyqbulaq aýylynda jantúrshigerlik órtten eki bala qaza tapty. Oqiǵanyń mán-jaiy tergelip jatyr, dep jazady Sputnik agenttigi.
Budan buryn habarlanǵandai, iis tiip ýlanǵan balalardyń denesin órt sóndirýshiler jýynatyn bólmeden taýypty. Qaza tapqan er balalardyń biri alty jasta, ekinshisi tórt jasta bolǵan.
"Qazir órttiń bastapqy sebepteri qarastyrylyp jatyr: otty paidalanýda qaýipsizdik erejesin saqtamaý, balalardyń tentektigi nemese ádeii órt qoiý", - dep habarlady tótenshe jaǵdailar basqarmasynyń basshysy Qanat Ábdilov.
Semei ákimi Ermak Sálimov balalardyń qazasy týraly habar shyqqan boida oqiǵa ornyna attanyp, anyq-qanyǵyn bildi.
"Qala ákimdiginiń málimetinshe, balalardyń anasy - 28 jastaǵy kelinshek qazir jumyssyz, aiaǵy aýyr eken. Órt bolǵan kúni esikti qulyptap, dárigerge qaralýǵa ketken. Qyryq alty jastaǵy otaǵasy Nur-Sultan qalasynda qurylysshy bolyp isteidi, qaiǵyly oqiǵa kezinde Semeide bolmaǵan", - dep málimet berdi Sálimov.
Otbasyǵa ákimdik járdem kórsetken
Qala ákimdiginiń málimetinshe, otbasy áleýmettik tólem alýǵa ótinish bermegen, jumyssyz retinde de tirkelmepti. Alaida otbasynyń qiyndyqqa tap bolǵanyn ákimdik bilip, barynsha járdem kórsetýge tyrysqan.
"Shaǵyn aýdan №48 orta mektepke qaraidy. Mektep qyzmetkerleri jylyna tórt ret úi-úidi aralaidy. Qyrkúiek, qarasha jáne qańtarda ata-anaǵa balalardy qoǵamǵa beiimdep, mektepke daiarlaý kerektigi túsindirildi. Reidterdiń birinde úlken uly ákesimen birge elordada ekeni belgili boldy, al kenjesi bóten adamdardyń qolynda turǵan eken"- dedi Sálimov.
Balalar turyp jatqan sanitarlyq-turmystyq jaǵdaidyń tómendigine bailanysty, úidiń kenjesi Balalar úiine jiberilýi tiis edi. Alaida anasynyń aryzy men politsiia organdarynyń ótinishine bailanysty balany otbasyǵa qaitarypty.
"Otbasy turatyn mekenjai "Jolaman" otbasylyq dárigerlik ambýlatoriiasynyń ýchaskesine kiredi. Mekeme otbasyǵa únemi meditsinalyq aqyl-keńes berip, dárigerler balalardy ýaqytyly qarap otyrǵan. "Salamatty ana men bala" ailyǵynyń aiasynda otbasy kópbalaly bolmasa da, tiisti meditsinalyq kómek aldy", - dep atap ótti ákim.
Marqum balalardyń anasy daǵdarys ortalyǵynda
Shyǵys Qazaqstan oblysy ákiminiń orynbasary Ásem Núsipova aitqandai, júkti áieldi daǵdarys ortalyǵyna ornalastyrdy. Qazir psihologtar kómektesip jatyr.
Jergilikti bilik ókilderi otaǵasymen de kezdesipti, ol qazir Semeide týystarynyń úiinde turyp jatyr. Qala ákimdigi balalardy jerleý rásimin uiymdastyrýdy moinyna aldy.
