Konstitýtsiia kúni qarsańynda Semei qalasyndaǵy mýzeide Abaidyń 1885 jyly jazylǵan Qaramola jarǵysy kóptiń nazaryna usynyldy, dep habarlaidy QazAqparat.
Zańdar jinaǵy 2018 jyly Abaidyń «Jidebai-Bórili» memlekettik tarihi-mádeni jáne ádebi-memorialdyq mýzei-qoryǵy qyzmetkerleriniń Qazan qalasyna jasaǵan sapary barysynda tabylǵan. Kodeks 1885 jyly Qaramola eldi mekenindegi sezde, Abai joǵarǵy bi bolyp sailanǵanda qabyldanǵan. Sodan keiin Semei áskeri gýbernatorynyń buiryǵymen qujat Qazan ýniversitetiniń baspasynda arab álipbiimen shyǵaryldy. Qaramola jarǵysy – bul adam quqyǵy men bostandyǵyn qorǵaý týraly erejeler jinaǵy.
«1885 jyly Qaramola eldi mekeninde bilerdiń sezdi ótti. Sol sezde Abai joǵarǵy bi bolyp sailandy. Resei úkimetiniń jergilikti ókilderi hakimnen zańdar jinaǵyn jazyp berýdi ótingen. Úsh kún ishinde bilermen keńese otyryp, Abai osy jarǵyny shyǵardy», - deidi Abai atyndaǵy mýzei direktory Meiramgúl Qairambaeva.
Buryn Qazaqstanda osy jarǵynyń tek kiril qarpimen jazylǵan nusqasy ǵana bolǵan. Ol Semeidegi mýzeide 60 jyldardan bastap saqtalýda.
«Qujattyń túpnusqasy bolmaǵan. Endi zertteýshiler kiril qarpimen mashinkamen jazylǵan kóshirmesin túpnusqamen salystyra alatyn bolady. Sonymen qatar birqatar máselelerge núkte qoiylady. Sebebi buǵan deiin keibir taraýlar boiynsha daý-damailar týyndaǵan edi. Kirill qarpine aýdarǵanda da qatelikter ketýi múmkin. Zertteýshiler úshin bul óte úlken olja. Konstitýtsiia kúnine orai osy zańdar jinaǵyn kelýshilerge kórsetýdi mańyzdy dep sanaimyz», - dedi Meiramgúl Qairambaeva.
