Memleket basshysy Abai oblysyna jumys sapary barysynda jazýshy Muhtar Áýezov pen ǵalym Qaiym Muhamedhanovqa arnalǵan eskertkishti ashty, dep habarlaidy "Ult aqparat" Aqordaǵa silteme jasap.
Prezident sharaǵa qatysýshylar aldynda sóilegen sózinde eki tulǵanyń tól tarihymyzda erekshe oryn alatynyn atap ótti.
– Bul – ustaz ben shákirt, aǵa men ini arasyndaǵy rýhani birliktiń simvoly. Shyn máninde, qos alypty bóle-jaryp qaraý múmkin emes. Olar Abai murasyn zerttep, dáripteýge ólsheýsiz eńbek sińirdi. Tól ádebietimizdi jańa beleske kóterdi. Muhtar Áýezov Abaidy, Abai arqyly qazaqty búkil álemge tanytty. Uly oishyldyń kórkem beinesin somdap, onyń asyl murasyn adamzattyń ortaq qazynasyna qosty. Jazýshynyń ár týyndysy jurtymyzdyń júreginen óshpes oryn aldy. Muhtar Áýezov – álem ádebietiniń shyńyna kóterilgen qalamger. Al Qaiym Muhamedhanov – uly jazýshynyń jaqyn serigi ári shákirti. Ol búkil ǵumyryn Abaitaný, Shákárimtaný jáne Alashtaný ǵylymyna arnady. Qýǵyn-súrginge ushyrasa da, taǵdyrdyń synaǵyna qarsy turyp, eline adal qyzmet etti, – dedi Memleket basshysy.
Prezident ult tarihyndaǵy birtýar tulǵalarymyzdy ulyqtaý paryz ekenin jáne bul eskertkish Muhtar Áýezovtiń 125 jyldyq toiyna tartý bolǵanyn aitty.
Sonymen qatar Memleket basshysy sharaǵa qatysýǵa kelgen bir top ziialy qaýym ókilderimen kezdesti. Olardyń qatarynda jazýshy men ǵalymnyń urpaqtary, abaitanýshylar, osy óńirde týyp-ósken birqatar aqyn-jazýshylar boldy.
