Shyǵys Qazaqstan oblysynyń Semei qalasynda Abaidyń «Jidebai-Bórili» memlekettik qoryq-mýzeiinde «Kóregendi kósem, parasatty sheshen, el qamqory – Qunanbai» atty kórme ashyldy, dep habarlaidy "Ult aqparat".
Kórmeniń uiymdastyrylýyndaǵy negizgi maqsat – dúiim jurtqa Abaidyń ákesi Qunanbai qajynyń ómiri jaily tereńirek tanystyrý.
Qunanbai Óskenbaiuly bi, aǵa-sultan jáne kórnekti qoǵam qairatkeri bolǵan. Onyń ákesi Óskenbai Yrǵyzbaiuly tobyqty rýyn bilegen bedeldi kisi edi. Qunanbai áýel basta aiadai aýyldaǵy eldi basqaryp, keiinnen dárejesi artyp, aǵa-sultan atanǵan. Búgingi kórmege qoiylǵan tarihi jádigerler onyń ómir joly týraly syr shertedi. Mýzeige kelýshiler nazaryna qajynyń jeke zattary, kúmis belbeýi men taqiiasy qoiylǵan. Eksponattardyń jalpy sany – 70-ke jýyq.
«Abaidyń 175 jyldyǵyna orai aqynnyń ákesi Qunanbai Óskenbaiulyna arnalǵan kórme ashtyq. Munda sol kezeńniń tynys-tirshiligin beineleitin kóptegen eksponattar usynylǵan. Budan bólek, qajy jaily jazylǵan kitaptar men muraǵattyq basylymdardaǵy túrli maqalalar qoiyldy. Bul kórme halyqqa hákimniń ákesi týraly kóp maǵlumat alýǵa múmkindik beredi», - deidi mýzeidiń jetekshi ǵylymi qyzmetkeri Nursulý Sanaqbekqyzy.
Kórmeniń saltanatty ashylýy barysynda akademik Erlan Sydyqovtyń «Qunanbai» atty kitabynyń tusaýkeseri ótti.
«Búginde shahardyń barlyq oqý oryndarynda Qunanbaidyń ómiri týraly baiandaityn bul kitaptyń tanystyrylymy ótip jatyr. Óskeleń urpaq úshin sol kezeńniń tarihymen tanysý óte paidaly bolmaq», - deidi Abai atyndaǵy mýzei direktorynyń qoǵammen bailanys jónindegi orynbasary Turdykúl Qasenuly.
