Semeide biyl qalalyq biýdjetten Áýezov dańǵyly men oǵan irgeles kóshe joldaryn ortasha jóndeýge 1 milliard teńge bólingen, dep habarlaidy "Ult aqparat".
Shahardaǵy ainalma joldan et kombinaty aýdanyndaǵy Baiǵojina kóshesine deiingi jol jóndelmek. Sondai-aq Áýezov dańǵylyna irgeles Tarbaǵatai, Irtyshskaia, Krestianskaia jáne 410 kvartal kósheleriniń joldaryna ortasha jóndeý júrgizý josparlanýda. Konkýrs qorytyndysy boiynsha merdiger «OblShyǵysJol» JShS bolsa, qosalqy merdiger – «Firma Aziia» JShS. Áýezov dańǵyly boiynsha jumystardy aiaqtaý 1 qazanǵa josparlanyp otyr.
«Áýezov qiylysynda kólik júrgizýshileriniń jol apatyna túsý qaýpi joǵary edi. Qazirgi ýaqytta ol olqylyqtyń orny toltyryldy. Birinshi rette, ainalma joldan Selevin kóshesine deiin, odan ári Selevinnen et kombinatyna deiin qamtylatyn bolady. Qajetti tehnika jumyldyrylǵan. Ortasha jóndeýge – 3 jyl, kúrdeli jóndeýge – 5 jyl kepildik bar», – deidi qalalyq jolaýshylar kóligi jáne avtomobil joldary bóliminiń bas mamany Dinara Kákenova.
Qalanyń basqa aýmaqtarynda da jol jóndeý jalǵasýda. Búginde Elemesov kóshesinde jóndeý jumystary aiaqtalýǵa jaqyn. Altai, Sevastopol, Sinitsin, Stalskii jáne Griaznov kóshelerinde ortasha jóndeý jumystary aiaqtaldy. Sonymen qatar temirjolshylar kentine deiingi jolǵa ortasha jóndeý júrgizilgen.
