Foto: Polisia.kz
Semei qalasynda buzaqylardyń áreketinen zardap shekken 11 jastaǵy balaǵa QR Ishki ister ministrliginiń «Dinamo» dene shynyqtyrý-sport qoǵamy qoldaý kórsetti, – dep jazdy Polisia.kz.
Semei qalasynda bolǵan buzaqylyq oqiǵasy qazaqstandyqtardy beijai qaldyrmady. Qoǵamnyń jappai qoldaýynyń arqasynda mektep oqýshysy men onyń otbasy jalǵyz emes ekenin sezindi. Bul iske politsiia vedomstvosynyń basshylyǵy erekshe mán berip, tergeýdi jeke baqylaýyna aldy.
Jasóspirimniń bolashaǵyna alańdaýshylyq bildirgen QR Ishki ister ministrliginiń «Dinamo» dene shynyqtyrý-sport qoǵamy ony óz qamqorlyǵyna alyp, sport arqyly jigerlendirmek. Dinamolyqtar balaǵa tálimgerlik kórsetip, senimdiligin nyǵaitýǵa, ózin qorǵai bilýge úiretýdi maqsat tutyp otyr.
Abai oblysy Politsiia departamentiniń bastyǵy Bektore Sultan Semeidegi «Dinamo» sport kesheninde jasóspirimdi qarsy alyp, oǵan jas sportshylarmen birge zaldy aralatyp, jattyǵý protsesimen tanystyrdy.
– Biz balaqai ózin eshqashan jalǵyz sezinbeýi úshin bar kúshimizdi salamyz. Sport – tek deneni shynyqtyrý ǵana emes, ol minezdi qalyptastyryp, qiyndyqtardy jeńýge úiretedi. Eń bastysy – sporttyq orta naǵyz otbasy siiaqty, senimdi tirek bola alady, – dep atap ótti departament basshysy.
Bala ásirese boksshylardyń jattyǵýyn qyzyǵýshylyqpen tamashalady. Bul sport túri oǵan burynnan unaitynyn aitqan jasóspirim endi «Dinamo» mamandandyrylǵan jattyqtyrýshylarynyń jetekshiligimen tegin jattyǵý múmkindigine ie boldy. Sol kúni-aq ol alǵashqy soqqysyn boks grýshaǵa baǵyttap, óz kúshin synap kórdi. Jattyǵý sońynda oǵan «Dinamo» sporttyq formasy tabys etildi.
– Endi ol turaqty túrde jattyǵyp, kúsh-qýatyn arttyryp, óz-ózine degen senimdiligin nyǵaitatyn bolady. Eger jaqsy nátije kórsetse, kelesi qadamy «JAS SAQShY» politseilik synyptarynyń qataryna qosylý bolmaq. Munda ol quqyqtyq tártip pen tártiptilik týraly qundy bilim alady, – dep málimdedi politsiia departamentiniń ókilderi.
Bul bastama – balanyń ómirine tyń serpin berip qana qoimai, onyń bolashaǵyna degen senimin kúsheitetin mańyzdy qadam.
