Abaidyń ádebi- memorialdyq mýzeiinde aqynnyń 175 jyldyq mereitoiyna orai «Altyn Altai» atty tarihi jádigerler kórmesi ashyldy, dep habarlaidy "Ult aqparat" Semei qalasynyń aqparattyq ortalyǵyna silteme jasap.
Kórme maqsaty - qazaq jerinen tabylǵan tańǵajaiyp qazba jádigerlerimen kópshilikti tanystyrý.
Kórme ekspozitsiialary - «Berel» memlekettik tarihi-mádeni mýzei-qoryǵyndaǵy eksponattar. Olardyń arasynda bizdiń dáýirimizge deiingi IV-III ǵasyrlarda ómir súrgen saq taipalarynyń turmystyq zattary men basqa da qazba jumystary kezinde tabylǵan tarihi zattar bar. Buǵy múiizinen jasalǵan at ábzelderi men qalqan, múiizden jasalǵan áshekeiler, Saq qorǵanynan tabylǵan ózge de buiymdar kelýshilerdiń nazaryn aýdaratyny sózsiz. Sondai-aq ertede tabylǵan adam qańqasyna negizdelgen antropologiialyq jańǵyrtýdan ótken er jáne áiel adamnyń syrt beineleri de qoiylatyn bolady.
«Abai atamyzdyń 175 jyldyq mereitoiy qurmetine orai uiymdastyrylǵan kórmemizde kelýshilerdi ata-babamyzdyń ómir súrý salty jáne tarihymen tanystyrýdy maqsat ettik. Munda qoiylǵan ár eksponat mýzei qoryndaǵy túpnusqa»,- deidi «Berel» mýzei-qoryǵynyń direktory Almas Sarbasov.
Berel qorymy- Qazaqstandaǵy saq dáýiriniń tarihi eskertkishi. Qorǵan bizdiń dáýirimizge deiingi V-IV ǵasyrlarda turǵyzylǵan. Qorym Shyǵys Qazaqstan oblysy Buqtarma ózeniniń oń jaǵyndaǵy Berel aýylynan jeti shaqyrym qashyqtyqtaǵy ońtústik batystaǵy taýly jazyqta ornalasqan. Búgingi kúni qorymda júzge tarta qorǵan bar. Semeilikter nazaryna bir ai boiy usynylatyn kórmege jiyny júzge tarta jádigerler qoiylǵan.
