Semeide Uly Abaidyń 175 jyldyǵy qarsańynda qundy kitaptyń tusaýkeseri ótti, dep habarlaidy "Ult aqparat" Semei aqparat ortalyǵyna silteme jasap.
Filosofiia ǵylymdarynyń kandidaty, abaitanýshy, ǵalym Asan Omarovtyń basshylyǵymen jaryq kórgen kitap eki tomnan turady. Birinshi tomy – Abaidyń ár jyldary jazylǵan óleńderine arnalsa, al ekinshi tomyna aqynnyń qara sózderi men poemalary enip otyr.
Kitapta Abaidyń 200-ge jýyq óleńiniń jazylǵan jyldary rettelip, toptastyrylǵan. Sondai-aq, kitapta Abai Qunanbaiulynyń ár óleńi qashan, qalai jazylǵany týraly málimet pen olardyń mazmunyna túsinikter berilgen.
«Mundai jinaq Abaidyń 150 jyldyq mereitoiynda jaryqqa shyqqan. Sodan beri 25 jyl ýaqyt ótipti. Osy jyldar ishinde aqynnyń jańa óleńderi tabylyp, jańartý qajet boldy. Osy maqsatta Abaidyń 175 jyldyǵy qarsańynda jinaqty jańa shyǵarmalarmen tolyqtyryp shyǵarýdy maqsat tuttym. Bul bastamany qolǵa alǵanyma 3 jyl ýaqyt boldy. Mine, búgin berekeli is óz jemisin berip, eki tomdyq kitap jaryq kórip otyr. Kitaptyń basty ereksheligi – aqynnyń árbir óleńine túsinik berilgen. Kúni búginge deiin Abai óleńderiniń hronologiiasy durys berilmei, óleńderi jinaqylyq tappaǵan. Men ár óleńiniń jazylǵan jyldaryna qarai toptastyryp berýge tyrystym. Jalpy, kitapty 7 kezeńge bóldim. Oqyrman kitapty oqi otyryp, Abaidy jas Abai, bala Abai, jigit Abai, oishyl Abai, ustaz Abai dep jekelei tani alady. Ázirge 100 danamen óz qarajatyma shyǵarǵan bul kitaptyń taralymy kóbeietinine senimdimin», - dedi A. Omarov.
Aita keteiik, kitap Semeidiń «Intellekt» baspasynan shyǵyp, oqyrmanǵa jol tartty.
