Shyǵys Qazaqstan oblysynyń ákimi Danial Ahmetov Semeidegi Qaraǵaily shaǵyn aýdanynda bolyp, qyryq bes kópbalaly otbasyǵa páter kiltterin tabys etti, dep habarlaidy QazAqparat.
Kópbalaly otbasylardy baspanamen qamtý maqsatynda oblystyq turǵyn úi qurylysy baǵdarlamasy aiasynda Qaraǵailyq shaǵyn aýdanynda salynǵan úiden 50 páter satyp alyndy.
Aimaq basshysy páterlerdi aralap, turǵyn úilerdiń sapasyna rizashylyǵyn bildirdi, turǵyndardy jańa qonystarymen quttyqtady.
«Barlyq kópbalaly analarǵa páter berý kerek. Biraq bul úlken másele bir jyldyń ishinde sheshilmeidi. Osy jyly Semeide jyl sońyna deiin taǵy 30 otbasyǵa páter beriledi degen jospar bar. Osy jyldyń ekinshi jarty jyldyǵynda qalada taǵy 179 myń sharshy metrge úi salamyz. Bul óz kezeginde máseleni sheshýge múmkindik beredi», - dedi D. Ahmetov.
Búgingi kúni memlekettik turǵynúi qorynan baspana alý úshin 10,5 myńnan astam azamat kezekte tur. Onyń ishinde 371-i kóp balaly otbasy. Biylǵy jyly oblystyń 290 kópbalaly otbasyna baspana kiltin tabystaý kózdelýde.
Aita ketý kerek, sońǵy úsh jylda oblysta turǵynúi qurylysy qarqyndy damýda. Ótken jyly ShQO-da 410,5 myń sharshy metr turǵynúi paidalanýǵa berildi. Al aǵymdaǵy jyly 639,9 myń sharshy metr turǵyn úidiń qurylysy bastaldy.
