Semei qalasynyń bir top ziialy qaýym ókilderi Uly Abaidyń ákesi Qunanbai Óskenbaiulynyń atyna kóshe berý týraly bastama kóterdi, dep habarlaidy "Ult aqparat" Abaidyń «Jidebai-Bórili» qoryq-mýzeiiniń baspasóz qyzmetine silteme jasap.
Bastama atalmysh qoryq-mýzeidiń Feisbýktegi paraqshasynda jariialandy.
«Qazaqtyń alyby da, asqary da - Abai, uly aqynnyń asyl murasy da adamzatqa ortaq. 2020 jyly Abai (Ibrahim) Qunanbaiulynyń týǵanyna 175 jyl, uly aqyn mýzeiiniń qurylǵanyna 80 jyl tolady. Bul mereitoi - respýblika jurtshylyǵy úshin aitýly oqiǵa. Abai, Shákárim, Muhtar, sondai-aq kúlli Alash arystarynyń mol murasyn erteńge jetkizý - tek Abai qarashańyraǵy qyzmetkerleriniń ǵana emes, barsha el igiligin oilaǵan azamattardyń paryzy», - delingen habarlamada.
«Jidebai-Bórili» memlekettik qoryq-mýzeiiniń bastamasymen ústimizdegi jyldyń 16 qazanynda Semei qalasynyń ákimi E.Sálimovke respýblikaǵa eńbegi sińgen bir top qairatkerler men abaitanýshylar atynan Qunanbai Óskenbaiulyna kóshe berý týraly hat joldanǵan.
«Abaidyń týystyq ainalasynda ákesi Qunanbai Óskenbaiulynyń orny erekshe. Zamanynda týǵan ultynyń salt-dástúrin berik ustanyp, el-jurtyna myǵym bilik qurǵan aǵa sultan Qunanbai - óz zamanynyń birtýar qairatkeri. Adolf Ianýshkevichtiń «Kúndelikter men hattar» kitabyndaǵy Qunanbaiǵa berilgen minezdeme onyń 40 jasqa deiingi minez-qulqyn, is-áreketin, abyroi-bedelin tanytady: «Qunanbai bidiń jasy Baraq sultannan biraz úlken. Bul da dala óńirinde aty keń jaiylǵan adam. Qarapaiym qazaqtyń balasy. Tabiǵat oǵan kesek aqyl, ǵajaiyp es jáne júirik til bergen. Isker, óz atalastarynyń igiligi úshin qam jeidi. Qazaqtarǵa qatysty rossiialyq ýstavtardy bes saýsaǵyndai biledi. Qara qyldy qaq jarǵan bi jáne ónegeli musylman». Qunanbaidyń óz zamanynda qandai kesek tulǵa bolǵanyn Qazaqstannyń, Reseidiń Omby, Sankt-Peterbýrg, Moskva qalalarynyń arhivterindegi Tobyqty eliniń jai-kúii baiandalatyn jazbalar da málim etedi», - delingen habarlamada.
Osy aitylǵan jailardy eskere otyryp, ziialy qaýym ókilderi qala ákiminen Semeidiń kórikti bir kóshesine qazaq halqynyń Qunanbaidai aiaýly perzentiniń esimin berýdi suraidy.
«Semei qalasy ziialy qaýymy atynan N.Sembaev, H.Mataev, A.Espenbetov, N.Ápsálámov, B.Ersálimov, M.Janbolatov, A.Ahmetjanov, S.Koshkin, Z.Toqaev, T.Ábdikákimov, B.Júnisbekov, M.Muhamediuly, A.Omarov jáne t.b. qol qoidy. Semei qalalyq ákimdigi óskeleń urpaqty ultjandylyq rýhta tárbieleýdegi máni zor igilikti isti biraýyzdan qoldai otyryp, Abai Qunanbaiulynyń aldaǵy 2020 jyly toilanatyn 175 jyldyǵyna orai qala turǵyndaryna erekshe tartý jasaitynyna senimdimiz», - delingen habarlamada.
