Semei qalasynyń turǵyny Reseiden arzanǵa kólik jetkizip beretinin aitqan alaiaqqa senip, 1 mln teńgesinen aiyryldy, dep habarlaidy "Ult aqparat".
Shyǵys Qazaqstan oblystyq Politsiia departamenti baspasóz qyzmetiniń málimetine súiensek, politsiiaǵa habarlasqan 36 jastaǵy er adam shilde aiynyń basynda Reseiden arzan kólik jetkizip beretinin aitqan belgisiz bireýge 1 mln teńge aqsha bergen. Alaida keiinnen alaiaqtyń arbaýyna túskenin túsindi.
«Jedel-izdestirý sharalaryn júrgizý barysynda tártip saqshylary kúdiktini qolǵa túsirdi. 39 jastaǵy Semei turǵyny óz kinásin tolyqtai moiyndap otyr. Belgili bolǵandai, alaiaq jábirlenýshiniń aqshasyn jeke qajetine jumsap úlgergen», - dep habarlady vedomstvo ókilderi.
Qazirgi ýaqytta atalǵan fakti boiynsha QR Qylmystyq kodeksiniń 190-baby 1-bóligi (Alaiaqtyq) boiynsha sotqa deiingi tergeý amaldary júrgizilýde.
