Kórneki sýret: picture-alliance/dpa/H. Wiedl
"Semei ormany" tabiǵi rezervatynyń basshylary jemqorlyq úshin sottaldy, - dep habarlaidy "Ult aqparat" Sybailas jemqorlyqqa qarsy kúres agenttiginiń baspasóz qyzmetine silteme jasap.
"29 mamyrda Abai oblysy boiynsha Qylmystyq ister jónindegi mamandandyrylǵan aýdanaralyq sotymen QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar dúniesi komitetiniń "Semei ormany" memlekettik orman tabiǵi rezervaty" RMM basshylyǵyna jáne basqa da tulǵalarǵa qatysty úkim jariialandy.
Memlekettik mekemeniń úsh basshysy uiymdasqan qylmystyq topqa qatysýǵa jáne kásipkerlerden júieli negizde 700 myńnan 13 million teńgege deiin para alýǵa kináli dep tanyldy. Olar zańsyz syiaqyny laýazymdy tulǵalarǵa rezervat aýmaǵynda sanitarlyq tazalaý men aǵash kesýge ruqsat bergeni, memlekettik satyp alý jónindegi sharttarǵa kedergisiz qol qoiǵany, sondai-aq jalpy qamqorlyǵy úshin berdi" - delingen habarlamada.
Rezervattyń úsh basshysy 10 jylǵa sottaldy, al bes para berýshi para bergeni úshin kináli dep tanylyp, bir jarym jyldan úsh jarym jylǵa deiingi merzimge bas bostandyǵynan aiyryldy.
Sondai-aq barlyq sottalǵan adam ómir boiy memlekettik qyzmette, jergilikti ózin-ózi basqarý organdarynda, qarjy uiymdarynda jáne kvazimemlekettik sektorda qyzmet atqarý quqyǵynan aiyryldy.
Úkim zańdy kúshine engen joq.
