Semei qalasyndaǵy kólik kolledjiniń direktory Aibek Nuǵymarov karantin kezinde qonaq bop toiǵa barǵan, dep habarlaidy "Ult aqparat" ShQO aqparat ortalyǵyna silteme jasap.
Aibek Nuǵymarovtyń qalada toiǵa barýy sońǵy eki kún ishinde qyzý talqylanǵan jańalyqtardyń biri boldy. Osyǵan orai ShQO bilim basqarmasy túsinik berdi.
«Oblystyń barlyq kolledjderi jańa 2020-2021 oqý jylyna daiyndyq sharalaryn qabyldady. Aýyldyq jerlerde jáne shaǵyn qalalarda ornalasqan 6 kolledjde ǵana taýarlar men kórsetiletin qyzmetterdiń sapasy men qaýipsizdigin baqylaý komitetiniń departamentimen kelisim boiynsha oqý jyly barlyq sanitarlyq talaptardy qatań saqtai otyryp, dástúrli formatta bastaldy. Osyndai qiyn kezeńde stýdentter men qyzmetkerlerdiń densaýlyǵyn saqtaý - bilim mekemeleriniń basshylyǵymen ótkiziletin jinalystardyń kún tártibinde qaralatyn negizgi ári mańyzdy máseleniń biri. Mundai kúrdeli kezeńde barlyq jumysshylar men stýdentterge úlgi bolatyn direktordyń ózi sanitarlyq-epidemiologiialyq talaptardy buzyp otyr. Aibek Serikboluly qazirgi ýaqytta eńbek demalysynda. Jumysqa shyqqannan keiin ony tártiptik jaýapkershilikke tartý máselesi qaralady» delingen bilim basqarmasynyń basshysy Sairangúl Jumadilovanyń jaýabynda.
Aita keteiik, sońǵy kúnderi jelide Aibek Nuǵymarovtyń toida júrgen videosy taraǵan bolatyn.
