Túrkistan oblysy Tólebi aýdanynda sý tasqynynan kelgen zardapty qalpyna keltirý jumysy qyzý júrgizilip jatyr. Bul jumysqa 8 merdiger kompaniia men 6 injiniringtik qyzmet kórsetýshi mekeme jumyldyrylǵan, dep habarlaidy "Ult aqparat".
Atalǵan aýdanda mamandardyń qorytyndysymen 38 úi jaramsyz dep tanylǵan bolatyn. Qazirgi tańda 17 úi buzylyp jatyr. Onyń ishinde 3 úidiń irgetasyn quiý jumystary bastaldy.
Sel saldarynan 78 azamat evakýatsiia ortalyǵyna jatqyzylsa, qazirgi tańda 40-tan astam azamat aǵaiyn-týystarynyń úiine jaiǵasqan. Aýdan ákimi Baýyrjan Omarbekovtyń aitýynsha, evakýatsiia ortalyǵynda ornalasqan azamattar úsh mezgil tamaqpen qamtylǵan. Olarǵa barlyq qajetti jaǵdai jasalǵan.
«Zardap shekken 38 baspana tolyqtai súrilip, ornyna jańa baspana salynady. Olardy qalpyna keltirý jumystaryna 510 mln teńge baǵyttalmaq. Jalpy qurylys jumystaryn 1.5-2 ai ishinde aiaqtaýdy josparlap otyrmyz»,- dedi Baýyrjan Omarbekov.
