Almaty oblysynyń Panfilov aýdanyndaǵy Penjim aýylynda sý tasqynynan apatty dep tanylǵan úi joq. Bul jóninde Panfilov aýdany ákiminiń baspasóz qyzmeti resmi málimdedi.
«Arnaiy qurylǵan komissiia anyqtaǵandai, 181 úidiń aýlasyn sý shaiyp, 31 úidiń ishine sý kirgen. Ázirge apatty dep tanylǵan úi joq. Aýyl ishindegi aryqtar tolyq tazalanyp, buzylǵan kópir qalpyna keltirildi. Qazirgi ýaqytta 120 úidiń aýlasy men 25 úidiń ishi tolyq tazalandy. 370 tonnadai qaldyq qoqystar shyǵaryldy», - delingen vedomstvo taratqan aqparatta.
Ár úidiń aýlasyna eki «KamAZ» shaǵyl tógilip, aýlalardy abattandyrý jumysy júrip jatyr. Jedel qurylǵan komissiia materialdyq shyǵyndardy esepteý ústinde. Shyǵyndar tolyq eseptelgen soń komissiia sheshimimen ákimshilik tarapynan qajetti kómek kósetiletin bolady.
Oǵan deiin aýdan ákimi Temirlan Bektasovtyń uiymdastyrýymen kásipkerler aýyl turǵyndaryna kómek kórsetýdi bastady. Árbir kásipker úilerdiń jaǵdaiyna qarai qurylys materialdaryna kómek kórsetetinin jetkizdi.
«Sondai-aq, kásipkerler qulaǵan sarai, qora syndy aýlalardaǵy qajetti qurylys jumystaryna kómek jasamaq. Aýyldaǵy eki kásipker birlesip, turmysy tómen 20 otbasyǵa 50 000 teńge kóleminde qarjylai qoldaý kórsetetinin aitty. Basqa da turǵyndar azyq-túlik, turmystyq qajetti zattarmen kómektesýde. Sonymen qatar, «Qyzyl ai» qoǵamy 181 otbasynyń ár múshesine 50 000 teńgeden kómek kórsetetinin habarlady»,- dep málimdedi Panfilov aýdany ákiminiń baspasóz qyzmetinen.
Aita keteiik, bul másele oblys ákimi Amandyq Batalovtyń qatań baqylaýynda.
Esterińizge sala keteiik, 3 maýsym kúni keshki saǵat 20:30 shamasynda nóser jaýyn saldarynan Almaty oblysynyń Panfilov aýdanyndaǵy Penjim aýylyn sý basyp qalǵan bolatyn.
